काठमाडौँ । आइसिसी पुरुष टी–२० विश्वकप क्रिकेट प्रतियोगिताको आफ्नो पहिलो खेलमै नेपाल पराजित भएको छ । इंग्ल्यान्डले दिएको १ सय ८५ रनको चुनौतीपूर्ण लक्ष्य पछ्याएको नेपालले निर्धारित २० ओभरमा ६ विकेट गुमाउँदै १ सय ८० रन मात्रै बनाउन सक्यो र ५ रनले हार बेहोर्नुपर्यो ।
नेपालका लागि दीपेन्द्रसिंह ऐरीले सर्वाधिक ४४ रन बनाउँदै टोलीलाई जिततर्फ डोर्याउने प्रयास गरेका थिए । कप्तान रोहित पौडेलले पनि ३९ रनको महत्वपूर्ण योगदान दिए । ओपनर कुशल भुर्तेलले २९ रनको उत्कृष्ट इनिङ्स खेले भने अर्का ओपनर आसिफ शेख भने ७ रनमै सीमित भए ।
मध्यक्रममा आरिफ शेखले १० रन बनाए । लोकेश बमले ३९ रन जोड्दै नेपालको जितको आशा कायम राखेका थिए । तर गुल्शन झाले १ रन मात्रै बनाउन सके भने करण केसीले पनि १ रन थपेपछि नेपाल लक्ष्य नजिक पुगेर रोकियो ।
यसअघि भारतको मुम्बईस्थित वानखडे स्टेडियममा टस जितेर पहिले ब्याटिङ गरेको इंग्ल्यान्डले निर्धारित २० ओभरमा ७ विकेट गुमाउँदै १ सय ८४ रन बनाएको थियो । इंग्ल्यान्डको इनिङ्स नियन्त्रणमा राख्न नेपालका बलरले प्रशंसनीय प्रदर्शन गरेका थिए ।
नेपालका लागि दीपेन्द्रसिंह ऐरी र नन्दन यादवले समान २–२ विकेट लिए । शेर मल्ल र सन्दीप लामिछानेले १–१ विकेट हात पारेका थिए । बलिङतर्फ राम्रो प्रदर्शन भए पनि ब्याटिङमा अन्तिम ओभरसम्म दबाब कायम राख्न नसक्दा नेपालले जित गुमायो ।
नेपालले यसअघि सन् २०१४ मा बंगलादेशमा र सन् २०२४ मा अमेरिकामा भएको टी–२० विश्वकपमा सहभागिता जनाएको थियो । ती दुवै संस्करणमा नेपाल समूह चरण पार गर्न सफल भएको थिएन । यसपटक भने बलियो टोलीसँग प्रतिस्पर्धात्मक खेल खेले पनि पहिलो खेलमा हारबाट यात्रा सुरु भएको छ ।
यस खेलमा नेपालको प्लेइङ–११ मा कुशल भुर्तेल, आसिफ शेख, रोहित पौडेल, दीपेन्द्रसिंह ऐरी, आरिफ शेख, लोकेश बम, गुल्शन झा, करण केसी, शेर मल्ल, नन्दन यादव र सन्दीप लामिछाने रहेका थिए ।
विश्वकप अन्तर्गत नेपाल समूह ‘सी’ मा परेको छ । यस समूहमा इंग्ल्यान्डसँगै वेस्ट इन्डिज, इटाली र स्कटल्यान्ड रहेका छन् । आगामी खेलहरूमा नेपालले राम्रो प्रदर्शन गर्दै समूह चरण पार गर्ने लक्ष्य लिएको छ ।
