काठमाडौं । नेपालमा हाल पश्चिमी वायुको आंशिक प्रभाव कायम रहेकाले देशका विभिन्न भूभागमा बदली, हुस्सु तथा चिसो बढ्ने क्रम जारी रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ । पछिल्ला दिनहरूमा विशेषगरी तराई क्षेत्रमा बाक्लो हुस्सु लाग्नुका साथै पहाडी तथा हिमाली क्षेत्रमा आंशिक बदली देखिएको छ ।
महाशाखाको बुलेटिन अनुसार अहिले तराईका केही क्षेत्रमा बाक्लो हुस्सु लागेको छ भने कोशी, मधेस, बागमती, गण्डकी र लुम्बिनी प्रदेशका साथै कर्णाली र सुदूरपश्चिम प्रदेशका उच्च पहाडी तथा हिमाली भूभागमा आंशिक बदलीको अवस्था रहेको छ ।
आज दिउँसो कोशी, बागमती र गण्डकी प्रदेशका पहाडी तथा हिमाली क्षेत्रमा आंशिक बदली रहने सम्भावना रहेको छ । तराईका अधिकांश स्थानमा भने हुस्सु र कुहिरो लागिरहने भएकाले जनजीवन केही प्रभावित हुन सक्ने मौसमविद्हरूले बताएका छन् । विशेषगरी कोशी प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षासँगै हिमपातको सम्भावना रहेको छ ।
आज राति पनि तराईका केही क्षेत्रमा हुस्सुको प्रभाव कायम रहने पूर्वानुमान गरिएको छ । त्यस्तै कर्णाली र सुदूरपश्चिम प्रदेशका साथै गण्डकी प्रदेशका उच्च पहाडी तथा हिमाली क्षेत्रमा आंशिक बदली रहने सम्भावना छ ।
हिमपात र हुस्सुका कारण तापक्रम घट्ने तथा चिसो बढ्ने भएकाले आवश्यक सतर्कता अपनाउन मौसमविद्हरूले आग्रह गरेका छन् । विशेषगरी तराई क्षेत्रमा लाग्ने कुहिरोले सडक तथा हवाई यातायातमा आंशिक असर पर्न सक्ने भएकाले चालक, यात्रु तथा सर्वसाधारणलाई सावधानी अपनाउन सुझाव दिइएको छ ।
