काठमाडौं । काठमाडौं महानगरपालिकाका पूर्वमेयर तथा झापा–५ बाट प्रतिनिधिसभा सदस्यका उम्मेदवार बालेन शाहविरुद्ध निर्वाचन आयोगमा औपचारिक उजुरी दर्ता भएको छ।
उजुरीमा बालेन शाहले सामाजिक सञ्जालमार्फत प्रमाणविनै गम्भीर आरोप लगाएको, जसले निर्वाचन आचारसंहिता, प्रचलित कानून तथा लोकतान्त्रिक बहसको मर्यादा उल्लंघन गरेको दाबी गरिएको छ।
उजुरीकर्ताका अनुसार बालेनले प्रयोग गरेका अभिव्यक्तिहरूले व्यक्तिको प्रतिष्ठामा आँच पुर्याउने र मतदातालाई भ्रममा पार्ने सम्भावना रहेको छ। सो विषयमा निर्वाचन आयोगले अभिव्यक्तिको छानबिन गरी आचारसंहिता विपरीत ठहरिए आवश्यक कारबाही गर्नुपर्ने माग गरिएको छ।
यसैगरी, महोत्तरीसहित विभिन्न क्षेत्रमा रास्वपाले भारतीय नम्बर प्लेटका सवारी साधन प्रयोग गरेको आरोप लगाउँदै उक्त विषयमा समेत छानबिनको माग उजुरीमा समावेश गरिएको छ।
निर्वाचन आयोगले उजुरी अध्ययन गरी प्रक्रिया अनुसार अघि बढ्ने जनाएको छ।
