काठमाडौं । नेकपा (एमाले) को ११औँ राष्ट्रिय महाधिवेशन अन्तर्गत नयाँ नेतृत्व चयनका लागि सम्पन्न मतदानको अन्तिम परिणाम आज सार्वजनिक गर्ने तयारी गरिएको छ। विद्युतीय भोटिङ मेसिनमार्फत मतदान भएकाले मतगणना सुरु भएको करिब तीन घण्टाभित्र नतिजा आउने केन्द्रीय निर्वाचन आयोगले जनाएको छ।

केन्द्रीय निर्वाचन आयोगका उपाध्यक्ष सानुराज पोखरेलका अनुसार आवश्यक प्राविधिक प्रक्रिया पूरा गरी बिहान ८ बजेदेखि मतगणना सुरु गर्ने तयारी गरिएको हो। मुचुल्का उठाउने र दलीय प्रतिनिधिबीच सहमति कायम गर्ने प्रक्रिया सम्पन्न भएपछि गणना थालिनेछ। उपाध्यक्ष पोखरेलले भने, “हाम्रो तयारी र लक्ष्य बिहान साढे १० बजेसम्म सम्पूर्ण नतिजा सार्वजनिक गर्ने हो।”

नयाँ नेतृत्व चयनका लागि बुधबार बिहान ९:१२ बजेदेखि मतदान प्रक्रिया सुरु भएको थियो। निर्वाचनमा ८० वटा विद्युतीय भोटिङ मेसिनको प्रयोग गरिएको थियो। कुल २ हजार २ सय ६३ प्रतिनिधि मतदाता रहेको महाधिवेशनमा २ हजार २ सय २७ जनाले मतदान गरेका छन् भने ३६ जना प्रतिनिधि अनुपस्थित रहेका छन्।

एमालेको ३०१ सदस्यीय केन्द्रीय कमिटीका लागि ६ सय ४२ जनाको उम्मेदवारी परेको छ। नेतृत्वको मुख्य प्रतिस्पर्धामा अध्यक्ष पदका उम्मेदवार केपी शर्मा ओली र ईश्वर पोखरेल प्यानलसहित चुनावी मैदानमा उत्रिएका छन्।