काठमाडौं । दसैँको फूलपातिको दिन आज (सोमबार) देशभरको मौसम पूर्णतया सफा नरहने भएको छ । जल तथा मौसम पूर्वानुमान महाशाखाका अनुसार मनसुनी वायुको प्रभाव कमजोर रहे पनि स्थानीय वायुको प्रभावका कारण देशका विभिन्न भागमा बदली र वर्षाको सम्भावना रहेको छ ।
महाशाखाले आज बिहान जारी गरेको आगामी २४ घण्टाको मौसम बुलेटिनअनुसार, दिउँसो देशभरका पहाडी भू-भागमा सामान्यतया बदली रहनेछ भने बाँकी क्षेत्रमा आंशिक बदली हुनेछ ।
विशेषगरी कोशी प्रदेश, बागमती प्रदेश र गण्डकी प्रदेशका पहाडी भू-भागका केही स्थानहरूमा मेघगर्जन/चट्याङसहित मध्यम वर्षाको सम्भावना रहेको छ। यसका साथै, अन्य प्रदेशका पहाडी भू-भागका थोरै स्थानहरूमा र तराईका एक-दुई स्थानमा पनि मध्यम वर्षा हुने अनुमान गरिएको छ । यति मात्र होइन, कोशी प्रदेश, बागमती प्रदेश र गण्डकी प्रदेशका पहाडी भू-भागका एक-दुई स्थानमा भने भारी वर्षाको समेत सम्भावना रहेको महाशाखाले जनाएको छ ।
आज राति गण्डकी प्रदेश र सुदूरपश्चिम प्रदेश लगायत अन्य प्रदेशका पहाडी भू-भागमा सामान्यतया बदली रहनेछ भने बाँकी क्षेत्रमा आंशिक बदली हुनेछ । गण्डकी प्रदेशका पहाडी भू-भागका केही स्थानहरूमा, कोशी प्रदेश, बागमती प्रदेश, लुम्बिनी प्रदेश र सुदूरपश्चिम प्रदेशका पहाडी भू-भागका थोरै स्थानहरूमा तथा अन्य प्रदेशका एक-दुई स्थानमा मध्यम वर्षाको सम्भावना रहेको छ ।
आज बिहानैदेखि राजधानी काठमाडौँसहित देशका विभिन्न स्थानमा वर्षा भइरहेको छ । दसैँ मनाउन घर निस्केका सर्वसाधारणलाई मौसमको यो परिवर्तनले केही असहज बनाएको छ ।
