काठमाडौं । आइसिसी विश्वकप लिग टु अन्तर्गत स्कटल्याण्डविरुद्धको खेलमा करण केसीको अन्तिम क्षणको विस्फोटक ब्याटिङले नेपाललाई ऐतिहासिक जित दिलाएको छ । सोमबार स्कटल्याण्डको फोर्थहिल क्रिकेट मैदानमा नेपालले घरेलु टोलीलाई १ विकेटले पराजित गर्दै त्रिकोणात्मक सिरिजको पहिलो खेल आफ्नो पक्षमा पारेको हो ।
२९७ रनको चुनौतीपूर्ण लक्ष्य पछ्याउने क्रममा नेपालले अन्तिम ओभरको अन्तिम बलमा जित निकालेको हो । नेपाललाई जितका लागि एक रन आवश्यक हुँदा स्कटिस बलर मार्क वाटले वाइड दिएपछि नेपालले नाटकीय तरिकाले खेल जित्यो ।
तल्लोक्रमका ब्याटर करण केसी खेलको निर्णायक नायक बने । उनले ४१ बलमा ३ चौका र ४ छक्काको मद्दतले अविजित ६५ रन बनाए । ओपनर कुशल भुर्तेलले ११ चौका प्रहार गर्दै ४४ बलमा ५३ रनको योगदान दिए । अर्का ओपनर आसिफ शेखसँग उनले पहिलो विकेटका लागि ७२ रनको साझेदारी गरे । आसिफले २० रन बनाए ।
मध्यक्रममा गुलशन झाले ३० बलमा ४२, भीम सार्कीले ४०, कप्तान रोहित पौडेलले ३७ रन जोड्दै महत्वपूर्ण योगदान गरे ।
स्कटल्याण्डका ब्रेण्डन मक्कमुलनले ३ विकेट लिए । माइकल लिस्क र ज्याक जार्भिसले २/२ तथा जसपर डेभिडसनले १ विकेट हात पारे ।
नेपालले टस जितेर फिल्डिङ रोजेपछि घरेलु टोलीले ५० ओभरमा ७ विकेट गुमाउँदै २९६ रन बनायो । चार्ल्स टिएरले सर्वाधिक ८० रन जोडे भने फेन्ली म्याक्रिथले ५५ रन बनाए । कप्तान बेरिङ्टनले ४०, म्याथ्यु क्रसले ३९ र माइकल लिस्कले १८ रनको योगदान दिए । नेपालका करण, सोमपाल र रिजन ढकालले समान २ विकेट लिए भने सन्दीप लामिछानेले १ विकेट लिए ।
अंक तालिकामा सुधार
यो जितसँगै नेपाल लिग टु को पुछारबाट सातौं स्थानमा उक्लिएको छ । १३ खेलमा ८ अंक जोडेको नेपाल अब शीर्ष चारमा पर्न विश्वकप ग्लोबल छनोटको दौडमा पुनः सक्रिय भएको छ ।
१७ खेलमा २० अंक रहेको स्कटल्याण्ड भने चौथो स्थानमा यथावत् छ । सिरिजको तेस्रो टोली नेदरल्याण्ड्स रहेको यस त्रिकोणात्मक श्रृंखला विश्वकप २०२७ को छनोटका लागि निर्णायक बन्नेछ ।
