काठमाडौं । पछिल्लो समय काठमाडौंमा वायु प्रदूषणको स्तर अत्यधिक बढेको छ । सोमबार र मंगलबार, काठमाडौंले संसारकै सबैभन्दा प्रदूषित शहरको सूचीमा शीर्ष स्थानमा रह्यो । अहिले “बुधबार” पनि काठमाडौंको वायु प्रदूषण निकै अस्वस्थकरको तहमा पुगेको हो ।
आईक्यूएयरका तथ्यांक अनुसार, आज बिहान काठमाडौंको एयर क्वालिटी इन्डेक्स “एक्युआई” २६८ माइक्रोग्राम प्रतिघणमिटर मापन गरिएको छ, जुन मंगलबारको तुलनामा वृद्धि भएको हो । दिल्ली, भारतको प्रदूषण अझै उच्च स्तरमा छ, जहाँ एक्युआई ३३६ माइक्रोग्राम प्रतिघणमिटर मापन गरिएको छ । यस अनुसार, काठमाडौं अहिले ‘निकै अस्वस्थ’को श्रेणीमा छ भने दिल्ली खतरनाकको स्थितिमा पुगेको छ ।
वायु प्रदूषणका कारण काठमाडौंको वायुमा अस्वस्थकर धुलो र धुवाँका कणहरूको उपस्थिति अत्यधिक छ, जसको मुख्य कारण उद्योग, सवारी साधनबाट निस्कने धुवाँ, खुला डढेलो, फोहोर जलाउने क्रियाकलाप र सडक तथा निर्माण कार्यबाट उड्ने धुलो हो । यसका कारण स्वास्थ्य समस्यामा वृद्धि भएको छ, विशेष गरी श्वासप्रश्वास र मुटुका रोगीहरूको लागि स्थिति खतरनाक बनिरहेको छ ।
प्रदूषणको अवस्था सुधार गर्न वातावरण विभागले जनताको सचेतना र विशेष ध्यानको अपिल गरेको छ । बालबालिका, ज्येष्ठ नागरिक, श्वासप्रश्वास र मुटुका समस्यासँग जुझिरहेका व्यक्तिहरूलाई बढी सतर्क रहन अनुरोध गरिएको छ ।
