काठमाडौं । अन्तर्राष्ट्रिय महिला च्याम्पियनसिप अन्तर्गत आज नेपालले लेबनानको सामना गर्दैछ । त्रिपुरेश्वरस्थित दशरथ रंगशालामा हुने यो महत्वपूर्ण खेल साँझ ६ बजे सुरु हुनेछ ।
पहिलो खेलमा किर्गिस्तानलाई १-० ले पराजित गरेको नेपाली टोली आज पनि जितको लय कायम राख्न चाहन्छ । दोस्रो जित निकाल्दै फाइनल प्रवेशको सम्भावना बलियो बनाउने लक्ष्यका साथ नेपाल मैदान उत्रनेछ ।
लेबनान भने पहिलो जितको खोजीमा हुनेछ । प्रतियोगिताको पहिलो खेलमा म्यानमारसँग ३-१ को हार बेहोरेको लेबनानले आज नेपाललाई हराएर फाइनल सम्भावना जीवित राख्ने प्रयास गर्नेछ ।
पहिलो खेलमा शानदार जित निकालेको म्यानमार शीर्ष स्थानमा रहेको छ भने नेपाल दोस्रो स्थानमा छ । दुवै टोलीको समान ३ अंक भए पनि गोल अन्तरका कारण नेपाल दोस्रो स्थानमा परेको हो । अंकविहीन किर्गिस्तान तेस्रो स्थानमा रहँदा लेबनान तालिकाको पुछारमा छ ।
यसै प्रतियोगितामा आजै दिउँसो २ बजे हुने पहिलो खेलमा किर्गिस्तान र म्यानमार भिड्दै छन् । म्यानमार लगातार दोस्रो जित निकाल्ने लक्ष्यमा हुनेछ भने किर्गिस्तान पहिलो जित चाख्न चाहन्छ ।
महिला फुटबलमा नेपाल र लेबनान पछिल्लो एक वर्षमा दोस्रो पटक आमनेसामने हुन लागेका हुन् । गत वर्ष साउदी अरेबियामा सम्पन्न वाफ महिला च्याम्पियनसिपको सेमिफाइनलमा नेपालले लेबनानलाई २-१ ले हराएको थियो ।
आजको खेलमा लेबनान त्यो हारको बदला लिँदै घरेलु मैदानमै नेपाललाई स्तब्ध पार्ने लक्ष्यमा हुनेछ । तर घरेलु समर्थकको साथ र उच्च मनोबलका साथ मैदान उत्रने नेपाली टोली पुनः लेबनानलाई हराएर फाइनल यात्राको ढोका खोल्न चाहन्छ ।
