काठमाडौं । आसन्न चीन भ्रमणअघि नै प्रधानमन्त्री केपी शर्मा ओलीले मन्त्री हेरफेर गर्ने तयारी गरेका छन् । प्रधानमन्त्री ओलीले केही मन्त्रीको जिम्मेवारी हेरफेर र नयाँ मन्त्री नियुक्तिको तयारी गरेका हुन् ।
अबको एक साताभित्रै यसबारे निर्णय लिने बताइएको छ । प्रधानमन्त्रीनिकट स्रोतका अनुसार प्रधानमन्त्री ओलीले नेकपा एमालेबाट उद्योग वाणिज्य तथा आपूर्तिमन्त्री बनेका दामोदर भण्डारी र नेपाली कांग्रेसबाट संस्कृति, पर्यटन तथा नागरिक उड्डयन मन्त्री बनेका बद्री पाण्डेलाई फिर्ता पठाउने तयारी गरेका हुन् । दुवै मन्त्रीको कार्यसम्पादनमा चित्त नबुझेपछि ओलीले उनीहरूलाई फिर्ता पठाउने तयारी गरेको स्रोतको दाबी छ ।
मन्त्री भण्डारीले आर्थिक अनियमितता गरेको, बिचौलिया लगाएर सुपारी, वाइनको व्यवसाय गर्ने उद्योगीहरूबाट पैसा असुली गरेको जानकारी पाएपछि ओलीले उनलाई मन्त्री पदबाट हटाउन लागेको बताइएको छ । शनिबार बसेको एमाले सचिवालय बैठकमा पनि मन्त्री दामोदर भण्डारीको कार्यसम्पादन अत्यन्तै कमजोर देखिएकाले मन्त्रालयबाट फिर्ता बोलाउनेबारे छलफल भएको बताइन्छ ।
यसअघिको मन्त्रीपरिषद्मा पनि सहभागी भएका भण्डारी पुनः दोहोरिएका थिए । तर, दुई पटकसम्म पनि मन्त्री पद खाएका उनको कार्यशैलीबारे पार्टीभित्रै आलोचना भइरहेको छ ।
यसैगरी कांग्रेसको शेखर कोइराला समूहबाट पर्यटन मन्त्री बनेका बद्री पाण्डेले अपेक्षाअनुसार काम गर्न नसकेको भन्दै कांग्रेसबाटै उनलाई पदबाट हटाउन दबाब आएको छ । पाण्डेबारे पार्टी र समूहमै आलोचना भइरहेको छ । साथै कार्यसम्पादन पनि कमजोर देखिएकाले प्रधानमन्त्री ओलीले उनको बिदाइ गर्ने तयारी गरेका हुन् ।
पछिल्लो पटक उनी आर्थिक लेनदेनको विवादमा पनि फसेका छन् । कांग्रेसकै सांसद राजेन्द्र बजगाईँले मन्त्री पाण्डेमाथि घुस लिएर क्यासिनो सञ्चालनको लाइसेन्स दिएको आरोप लगाएका छन् । रोयल टाइगर रिक्रियसनलाई क्यासिनो सञ्चालनको लाइसेन्स दिँदा सञ्चालकले मन्त्रीलाई करोडौँ रुपैयाँ घुस बुझाएको उनको आरोप छ । तर मन्त्रीले भने इमानदार भएर काम गर्न खोजेपनि स्वार्थ समूहले घेराबन्दीमा पार्न खोजेको गुनासो गरेका छन् ।
प्रधानमन्त्री केपी शर्मा ओली दुवै मन्त्रीलाई जुनसुकै बेला पनि हटाउन सक्ने बताइएको छ । मन्त्रिपरिषद्लाई थप मजबुत बनाउन मन्त्रिपरिषद् हेरफेरको तयारी भइरहेको स्रोतको दाबी छ ।
गत असार १६ गते नेपाली कांग्रेससँगको सात बुँदे सहमतिको जगमा नेकपा एमालेका अध्यक्ष ओली गत असार ३० गते प्रधानमन्त्री नियुक्त भएका थिए लगत्तै भोलिपल्ट प्रधानमन्त्री ओलीले २२ सदस्यीय मन्त्रिपरिषद् विस्तार गरे । प्रधानमन्त्रीको आसन्न चीन भ्रमणलाई लक्षित गरेर राष्ट्रपति रामचन्द्र पौडेलले अमेरिका र चीनको राजदूत नियुक्त गरेका छन् । अमेरिकाका लागि लोकदर्शन रेग्मी र चीनका लागि प्राडा कृष्णप्रसाद ओली आइतबार राजदूत नियुक्त भएका हुन् ।
