काठमाडौं । प्रधानमन्त्री पुष्पकमल दाहाल ‘प्रचण्ड’ले संसद्को गतिरोधबारे नेपाली कांग्रेसका नेताहरूसँग फेरि छलफल गर्ने भएका छन् ।
प्रधानमन्त्रीले बिहान साढे ८ बजे छलफलका लागि बालुवाटारमा बोलाएको नेपाली कांग्रेस प्रमुख सचेतक रमेश लेखकले जानकारी दिए । नेपाली कांग्रेस नेताहरूलाई हिजो साँझ ६ बजे बोलाइएको भएपनि प्रधानमन्त्रीको व्यस्तताका कारण आज बिहानका लागि बैठक सारिएको हो ।
उपप्रधान एवं गृहमन्त्री रवि लामिछानेसमेत सहकारी प्रकरणमा दोषी देखिएको भन्दै नेपाली कांग्रेसले निरन्तर संसदीय छानबिन समिति बनाउनुपर्ने मागसहित संसद् अवरोध गर्दै आएको छ।
बिहीबार प्रतिनिधिसभामा भएको सत्तापक्ष र विपक्षको धकेला-धकेलले तिक्ततापूर्ण बनेको राजनीतिक माहौललाई सहज बनाउँदै मध्यमार्गी विकल्पमार्फत सहमति खोज्न प्रधानमन्त्रीले संवाद र छलफललाई पुनः अघि बढाएका हुन् ।
प्रधानमन्त्रीले समिति गठनमा गृहमन्त्री लामिछानेको नाम किटेर उल्लेख नगर्ने तर उनीसँग जोडिएका सहकारीको नाम राख्न सकिने गरी नेपाली कांग्रेसलाई सहमतिमा ल्याउने प्रयास गरेका छन् ।
प्रधानमन्त्रीले हिजो संसद् भवनस्थित आफ्नो चेम्बरमा नेपाली कांग्रेस प्रमुख सचेत लेखक, कार्यव्यवस्था परामर्श समिति सदस्य रामहरि खतिवडालगायत नेताहरूसँग छलफल गरेका थिए ।
