काठमाडौँ । नेपाली राष्ट्रिय क्रिकेट टिमका सदस्य सन्दीप लामिछाने एसिया कप क्रिकेटका लागि पाकिस्तान जाँदै छन् ।
काठमाडौं जिल्ला अदालतमा उनी विरुद्धको मुद्दा विचाराधीन रहेकाले अन्तिम सुनुवाइ कुरेर बसेका सन्दीप आज बिहान १०ः २० बजे कतार एयरवेजमार्फत पाकिस्तान प्रस्थान गर्न लागेका हुन् ।
सन्दीपको अर्को पेशी भने भदौ २१ गतेका लागि तोकिएको छ । सन्दीपविरुद्धको मुद्दाको आइतबार पनि सुनुवाइ नभएपछि एसिया कप खेल्नका लागि पाकिस्तान जान लागेको नेपाल क्रिकेट संघ क्यानका कार्यवाहक सचिव दुर्गाराज पाठकले जानकारी दिए । सन्दीप कतार एयरवेजको उडानमार्फत दोहा हुँदै पाकिस्तानको मुल्तान उत्रनेछन् ।
एसिया कपमा नेपालले भदौ १३ गते पाकिस्तानसँग मुल्तानमा र भदौ १८ गते श्रीलंकाको क्यान्डीमा खेल्नेछ । एसीसी प्रिमियर कपको च्याम्पियन बन्दै नेपालले एसिया कपमा स्थान बनाएको हो ।
