काठमाडाैँ । नेपाली कांग्रेसका नेता तथा प्रतिनिधि सभा सदस्य डा. सुनिल शर्माले नेकपा एमालेका अध्यक्ष केपी शर्मा ओली र नेपाली कांग्रेसका सभापति शेरबहादुर देउवालाई पनि प्रचण्ड नेतृत्वको सरकारले जेल हाल्ने षड्यन्त्र गरिरहेको बताएका छन् । ज्येष्ठ नागरिक समाजले मोरङको विराटचोकमा आयोजना गरेको कार्यक्रमलाई सम्बोधन गर्दै सांसद डा. शर्माले प्रचण्ड नेतृत्वको सरकारले राजनीतिक पूर्वाग्रहका आधारमा ओली र देउवालाई जेल हाल्ने षड्यन्त्र गरिरहेको बताएका हुन् ।
प्रचण्ड नेतृत्वको सरकार राजनीतिक पूर्वाग्रहका आधारमा अघि बढेको भन्दै सांसद शर्माले अहिले ओलीलाई जेल हाल्ने षड्यन्त्र बनिरहेको बताएका छन् । पहिले ओलीलाई जेल हाल्ने त्यसपछि देउवालाई पनि जेल हाल्ने गरी यो सरकारले षड्यन्त्र रचिरहेको उनले दाबी गरेका छन् ।
अरुकै इसारामा सरकार चलिरहेको भन्दै उनले अहिले ओली र देउवालाई जेल हाल्न षड्यन्त्र गराउनेले २०८४ अघि प्रचण्डलाई पनि जेल हाल्ने दाबी गरेका छन् ।
‘अहिलेको प्रचण्ड नेतृत्वको सरकारले अब ढिलो चाँडो ओली बा”लाई जेल हाल्दैछ, राजनीतिक पूर्वाग्रहका आधारमा पहिले ओली बालाई जेल हाल्ने र त्यसपछि शेरबहादुर देउवालाई जेल हाल्ने योजना बन्दैछ,’ सांसद शर्माले भने, ‘लेखेर राख्नुस्, अहिले यो जसले जेल हाल्न लगाउँदैछ, २०८४ अघि प्रचण्डलाई पनि जेल हाल्ने उसैको प्लानमा छ, हेक्का रहोस् प्रचण्ड जीलाई ।’
भ्रष्टाचारविरुद्ध बोल्दा आफूलाई गिरफ्तार गरिएको भन्दै सांसद शर्माले राज्यसत्ताले गरेका गलत कामविरुद्ध बोल्नेहरूको आवाज दबाउन सरकार लागिपरिरहेको आरोप लगाएका छन् । भ्रष्टाचार विरोधी अभियानमा कोही पनि पक्ष–विपक्ष नहुने भएकोले आफूले उठाएको आवाजलाई पक्ष–विपक्ष सबैले साथ दिएको भन्दै उनले खुशी व्यक्त गरेका छन् । राज्यसत्ताको दुरुपयोग गरेर देश लुट्ने छुट कसैलाई पनि नभएको भन्दै उनले गलत कामविरुद्ध सँधै बोलिरहने उल्लेख गरेका छन् ।
