काठमाडौँ । नेपाली नागरिकलाई भुटानी शरणार्थी बनाएर अमेरिका लैजाने भन्दै गरिएको ठगी प्रकरणमा थप १८ जना पीडितले प्रहरीमा उजुरी दिएका छन् ।
ती पीडितले झण्डै १ करोड ८५ लाख ९२ हजार भन्दा बढी रकम ठगिएको भन्दै काठमाडौँ उपत्यका अपराध अनुसन्धान कार्यालयमा उजुरी दिएको प्रहरी उपरीक्षक रवीन्द्र रेग्मीले बताए ।
काठमाडौँका सानु भण्डारी, केशव दुलालसमेत संलग्न भई नेपाली नागरिकलाई भुटानी शरणार्थी बनाई अमेरिका लैजान्छौँ भनेर प्रलोभन दिएर विश्वासमा पारी रकम ठगी गरेको आरोप लगाउँदै लमजुङ, सुनसरी, सिन्धुपाल्चोक, गोरखा, ललितपुर, चितवन, काठमाडौँलगायत जिल्लाका १८ जना पीडितले उजुरी दिएको प्रहरीले जनाएको छ ।
उक्त जाहेरी दरखास्त आवश्यक अनुसन्धान तथा कारबाहीका लागि जिल्ला प्रहरी परिसर टेकु, काठमाडौँमा पठाइएको रेग्मीले बताए ।
यही प्रकरणमा नेपाली कांग्रेसका नेता बालकृष्ण खाँण, एमाले नेता टोपबहादुर रायमाझीलगायत पुर्पक्षका लागि थिनामा रहेका छन् ।
