काठमाडौँ । कलाकारका लागि आफ्नो फिल्मको प्रिमिएर सधै प्रतीक्षा रहन्छ । उनीहरूलाई फिल्म अभिनयको सकारात्मक, नकारात्मक प्रतिक्रिया प्रिमिएरबाटै जो मिल्ने गरेको छ ।
जसले उनीहरूलाई पछिको दिनमा अगाडि बढ्न सहयोग पनि गर्छ । शनिबार हेटौंडामा आयोजित ‘नम्बरी सुन’ को प्रिमिएर भने फिल्मकी मुख्य अभिनेत्री नम्रता सापकोटाले मिस गरेकी छन् । उनको अन्य सुटिङ लगायत व्यस्त सेडुल भएर प्रिमिएर मिस भएको भने होइन । निर्माण युनिटसँग आर्थिक लगायत केही कुरोमा मतभेद रहेकोले प्रिमिएरमा उनी सहभागी नभएको हल्ला छ ।
तर बाहिर भएको हल्लामा सत्यता नभएको नम्रता बताउँछिन् । काठमाडौँमै काम भएकोले आफू प्रिमिएरमा सहभागी हुन नपाएको उनको धारणा छ । फिल्मको रिलिज समय अझै धेरै बाँकी छ । अहिले देखिनै समय दिनु उपयुक्त नभएको उनी बताउँछिन् ।
‘हेटौडाको प्रचारमा अलिपछि नै जाऊ भन्ने लाग्यो । काठमाडांैमा काम पनि थियो । हिजो नयाँ गीत पनि रिलिज थियो’, सापकोटाले भनिन् ‘पेमेन्ट पनि अलिअलि बाँकी त छ । त्यो मुख्य कुरो होइन ।’ फिल्मको प्रचारप्रसारमा एक महिना पछि पुरै समय दिने सोच रहेको समेत उनले सुनाइन् ।
‘नम्बरी सुन’ मा नम्रताको अलावा गौरव पहाडी, किरण नेपाली, सरोज खनाल, गीता अधिकारी, बुद्धि तामाङ, राजाराम पौडेल, नारायण खाती लगायतको अभिनय छ । प्रिमिएरमा गौरव र किरण लगायतको सहभागिता थियो ।
भदौ १ गतेबाट सार्वजनिक प्रदर्शनमा आउन लागेको फिल्मका प्रस्तुतकर्ता नारायण खाती हुन् भने निर्देशक राजु गिरी रहेका छन् । फिल्मले सुनको इतिहास र सुन बनाउने सुनारको पुरानो चलनलाई कथामा उठाएको छ ।
