काठमाडौं । प्रिमियर लिगमा आइतबार भएको अलमा आर्सनल ब्राइटनसँग ३-० ले पराजित भएपछि उपाधि होडमा ठूलो धक्का लागेको छ ।
आर्सनलको घरेलु मैदानमा ब्राइटनले तीन गोल नै दोस्रो हाफमा गरेको थियो ।
ब्राइटनका लागि जुलियो इस्सिसोले ५१औं, डेनिज उनदाभले ८६औ र पर्भिस इस्तुपिनानले इन्जुरी टाइममा गोल गरे ।
आर्सनलको हराले म्यानचेष्टर सिटीलाई फाइदा पुगेको छ भने सिटीले अब एक खेल मात्र जिते लिग उपाधि जित्नेछन् ।
आइतबारै सिटीले एभरटनलाई हराएर आर्सनलमाथि ४ अंकको अन्तर बनाएको थियो । आर्सनललाई त्यो अंकदूरी कम गर्ने अवसर थियो । तर ब्राइटनसँग हारले आर्सनलको उपाधि जित्ने सम्भावनामा ठूलो झड्का लागेको छ ।
अब लिगमा आर्सनलले दुई खेल मात्र खेल्दा बाँकी छ भने शीर्ष स्थानको सिटीले अझै तीन खेल खेल्न बाँकी छ र आर्सनलमाथि ४ अंकको अग्रता छ । अब सिटीले तीन मध्ये एक खेल जिते पनि उपाधि जित्न पर्याप्त हुनेछ ।
सिटीले अर्को आइतबार चेल्सीलाई पराजित गरेमा घरेलु समर्थकको अगाडि उपाधि जित्नेछ ।
आर्सनललाई हराएपछि ब्राइटन ३४ खेलबाट ५८ अंक जोडेर छैटौं स्थानमा उक्लेको छ र शीर्ष चारको सम्भावना बाँकी राखेको छ । एक खेल बढी खेलेको म्यानचेष्टर युनाइटेड ६६ अंकसहित चौथो र लिभरपुल ६२ अंकसहित पाँचौ स्थानमा छ ।
