काठमाडौं । आगामी बैशाख १० गते हुने उपनिर्वाचनका लागि चितवन क्षेत्र नम्बर–२ मा चुनावी सरगर्मी बढेको छ । यो क्षेत्रको उपनिर्वाचनलाई चासोका साथ हेरिएको पनि छ । किनकि त्यहाँ राष्ट्रिय स्वतन्त्र पार्टी रास्वपाका सभापति रबि लामिछानेले फेरि उम्मेदवारी दिएका छन् ।
गत मंसिर ४ मा सम्पन्न आम निर्वाचनमा सो क्षेत्रबाट रबि लामिछाने विजयी भएका थिए । उनले नेपाली कांग्रेसका नेता उमेश श्रेष्ठ र नेकपा एमालेका नेता कृष्णभक्त पोखरेललाई पराजित गरेका थिए । रबि लामिछानेले ४९ हजार ३०० मत ल्याएर विजयी भएका थिए भने नेपाली कांग्रेसका नेता उमेश श्रेष्ठको १४ हजार ९८८ र नेकपा एमालेका नेता कृष्णभक्त पोखरेलको १४ हजार ६५२ मत आएको थियो । तर नागरिकता विवादमा राष्ट्रिय स्वतन्त्र पार्टी रास्वपाका सभापति रबि लामिछानेको विषयमा सर्वाेच्च अलादतमा रिट परेको थियो । गत माघ १३ मा सर्वाेच्च अदालतले त्यसको सुनुवाई गर्दै उनको सांसद पद खारेजको फैसला गरेको थियो ।
उनको सांसद पद खारेज भएपछि सो क्षेत्रमा बैशाख १० मा उपनिर्वाचन हुन लागेको हो । राष्ट्रिय स्वतन्त्र पार्टी रास्वपाका सभापति रबि लामिछानेले अमेरिकी नागरिकता त्यागेपछि नेपाली नागरिकता ब्युँताउने प्रक्रिया नअपनाएको भन्ने रिट परेको थियो ।
सर्वाेच्चको फैसला पछि माघ १५ गते आइतबार उनले जिल्ला प्रशासन कार्यालय काठमाडौबाट अमेरिकी नागरिकता लिनु अघि २०५० सालमा लिएको नेपाली नागरिकताकै नम्बर उल्लेख भएको नागरिकता लिए । उनले नेपाली नागरिकता पुनः प्राप्त गरेपछि फेरि चितवनबाट उम्मेदवारी दिएका हुन् । निर्वाचन आयोगको उपनिर्वाचनका लागि चैत २० गते मनोनयन दर्ताको लागि कार्यतालिका अनुसार सोमबार लामिछाने सहित प्रमुख राजनीतिक दल,केही साना दल र स्वतन्त्र उम्मेदवारहरुले मनोनयन दर्ता गरेका थिए ।
प्रमुख दलहरुबीच प्रतिस्पर्धा
राष्ट्रिय स्वतन्त्र पार्टी रास्वपाका सभापति रबि लामिछानेले उम्मेदवारी दिंदा नेपाली कांग्रेसका जित नारायण श्रेष्ठ र नेकपा एमालेका तर्फबाट रामप्रसाद न्यौपानेले उम्मेदवारी दिएका छन् । मुख्यत यी तीनजनाबीच मुख्य प्रतिस्पर्धा हुनेछ । राष्ट्रिय स्वतन्त्र पार्टी रास्वपाबाट फेरि सभापति रबि लामिछाने उम्मेदवार बन्दा नेपाली कांग्रेस र नेकपा एमालेका उम्मेदवार भने फेरिएका छन् । गत मंसिर ४ मा भएको निर्वाचनमा नेपाली कांग्रेसका तर्फबाट उमेश श्रेष्ठ र नेकपा एमालेका तर्फबाट कृष्णभक्त पोखरेल उम्मेदवार थिए ।
कसले जित्ला चुनाव ?
चितवनका यी तीनैजना बलिया उम्मेदवार हुन् । रबि लामिछाने काठमाडौंबाट गएर चुनाव लडेका हुन भने नेकपा एमाले र नेपाली कांग्रेस दुबै पार्टीका उम्मेदवार स्थानीय हुन् । नेपाली कांग्रेसका उम्मेदवार श्रेष्ठलाई सत्ता गठबन्धनमा रहेका दलहरुको समर्थन रहेको छ भने नेकपा एमाले एक्लै चुनावी मैदानमा उत्रेको छ । रबि लामिछानले उम्मेदवारी दर्ता गरेसँगै चुनावी घरदैलो शुरु गरिसकेका छन् । अरु उम्मेदवारको भन्दा रबिको प्रचार प्रसार बढी छ । उनीसँगै चुनावी अभियानमा हिड्ने गरेका रास्वपाका एक नेताका अनुसार रविका अघिपछि झण्डै १०-११ जना यूटूवरहरु साथमै हुने गरेका छन् । सत्ता स्वार्थमा रबिको पार्टीले देखाएको भूमिकाले विगतको भन्दा उनको अवस्था केही खस्केको र नेपाली कांग्रेस र नेकपा एमालेका उम्मेदवारहरु पनि बलिया भएकाले यसले नै चुनाब जित्छ भन्ने अवस्था अहिले नै आकलन गर्न नसकिने चितवनका स्थानीयको भनाई रहेको छ । तर चितवनबासीले नयाँ अनुहार भने खोजेका उनीहरु बताउँछन् । यो क्षेत्रमा कुल १ लाख २४ हजार ६९५ मतदाता रहेका छन् ।
