काठमाडौं । भुटानी राष्ट्रिय फुटबल टिमका कप्तान चेन्चो ग्याल्सेनले साविक विजेता मछिन्द्र एफसीबाट शहीद स्मारक ए डिभिजन लिग खेल्ने भएका छन् ।
प्रधानमन्त्री त्रिदेशीय कप फुटबल खेल्न काठमाडौंमा आएका २६ वर्षीय चेन्चोसँग मछिन्द्रले सम्झौता गरिसकेको छ । मछिन्द्र क्लब स्रोतका अनुसार दुवै पक्षले लिग खेल्नका लागि सम्झौता गरिसकेका छन् । ‘सबै प्रक्रिया पूरा भइसकेपछि औपचारिक रुपमा सार्वजनिक घोषणा गरिनेछ’, क्लब स्रोतले भन्यो ।
चेन्चोको टिम भुटान प्रधानमन्त्री कपको फाइनल होडबाट बाहिरिसकेको छ । चेन्चोलाई भुटानी समर्थकले रोनाल्डोसँग तुलना गर्छन् ।
इन्डियन सुपर लिग आईएसएल र आई लिग समेत खेलिसकेका चेन्चोले पहिलो पटक नेपालमा लिग खेल्न लागेका हुन् ।
केही समयअघि सम्पन्न आई लिगमा चेन्चो र नेपालका कप्तान किरण कुमार लिम्बुले राउण्ड ग्लास पञ्जावबाट सँगै खेलेका थिए । पञ्जावलाई आई लिग च्याम्पियन बनाउन दुवैले उत्कृष्ट प्रदर्शन गरेका थिए ।
ए डिभिजन लिगको सुरुवाती पाँच चरणको खेल सम्पन्न भइसकेको छ । साविक विजेता मछिन्द्रले जम्मा एक मात्र जितेको छ र ५ खेलबाट ५ अंकसहित ११औं स्थानमा छ । ए डिभिजन लिगको छैटौं चरणका खेलहरु चैत २० गतेदेखि सुरु हुनेछ ।
पहिलो रोजाईँका खेलाडीहरु अष्ट्रेलिया पलायन हुँदा मछिन्द्रले यस सिजन लिगमा सोचे अनुसारको प्रदर्शन गर्न सकेको छैन ।
विशाल राई, अभिषेक रिजाल लिग अघि नै अष्ट्रेलिया गएका थिए । सुनिल बल र मनिष डाँगी संकटा क्लबमा अनुबन्ध भएका थिए । सुनिल बल लिगको एक पछि नै अष्ट्रेलिया लागे । यस्तै कप्तान सुजल श्रेष्ठ र रन्जित धिमाल पाँच चरणको लिगपछि अष्ट्रेलिया लागिसकेका छन् ।
