एजेन्सी । रुसी राष्ट्रपति भ्लादिमिर पुटिनले अमेरिकाले आणविक परीक्षण गरेमा रुसले पनि सुरू गर्ने घोषणा गर्नुभएको छ ।
रुसी संसदलाई वार्षिक सम्बोधनका क्रममा पुटिनले प्रष्ट शब्दमा भन्नुभयो– ‘अमेरिकाले आणविक परीक्षण गर्छ भने रुस पनि तयार रहनुपर्छ । त्यसो भयो भने शीतयुद्धकालको अन्त्यसँगै प्रतिबन्ध लगाइएको आणविक परीक्षणको होड पुनः सुरू हुने छ ।’
अमेरिकी राष्ट्रपति जो बाइडेनको युक्रेन भ्रमणको मौका पारेर भएको सम्बोधनका क्रममा रुसी राष्ट्रपति पुटिनले युक्रेन युद्धका लागि पनि पश्चिमा देशहरुलाई दोषारोपण गर्नुभयो । उनीहरु हामीलाई पराजित गर्न र हाम्रो आणविक संयन्त्र पनि कब्जा गर्न चाहन्छन् भन्दै युक्रेनले प्रयोग गरिरहेका ड्रोनहरु नाटो विशेषज्ञहरुको सहयोगमा बनाइएको उहाँले बताउनुभयो ।
सम्बोधनका क्रममा पुटिनले पश्चिमा देशहरूको प्रतिबन्धका बाबजुद पनि रुसी अर्थतन्त्र सबल रहेको दाबी पनि गर्नुभयो । पश्चिमा देशहरूले सोचेभन्दा रुसको अर्थतन्त्र निकै बलियो रहेको दाबी गर्दै उहाँले सन् २०२२ मा जीडीपी २ दशमलव १ प्रतिशतले मात्रै घटेको बताउनुभयो ।
पश्चिमा विश्लेषकहरूले भने गत वर्ष रुसको अर्थतन्त्र २० देखि २५ प्रतिशतको घटेको दाबी गरेका थिए ।
पुटिनले अमेरिकी डलर र अन्य पश्चिमी देशका मुद्राहरूबाट स्वतन्त्र, स्थिर एवं सुरक्षित विश्वव्यापी भुक्तानी प्रणाली बनाउन साझेदारहरूसँग काम गरिरहने पनि बताउनुभयो ।
