एजेन्सी । इजरायलको पूर्वी जेरुसेलममा बन्दुकधारीको आक्रमणमा कम्तिमा सात जनाको मृत्यु भएको छ । वेस्ट बैंकको जेनिन शरणार्थी शिविरमा आक्रमण भएको एक दिन पछि भएको गोली हानाहानमा सो घटना भएको बताइएको छ ।वेस्ट बैंकमा इजरायली सेनाको आक्रमणपछि हिंसा बढ्दै गएपछि एक बन्दुकधारीले इजरायली बस्तीमा गोली चलाउँदा सात जनाको मृत्यु भएको बीबीसीले जनाएको छ । आक्रमणमा घाइते भएका १० जनाको अवस्था गम्भीर रहेको बताइएको छ ।
अधिकारीहरुले ७० वर्षका वृद्ध र १४ वर्षका बालकसहित १४ जनामाथि बन्दुकधारीले गोली चलाएको बताएका छन् । पूर्वी जेरुसेलमका एक जना २१ वर्षका युवा सो आक्रमणमा संलग्न भएको सुरक्षा अधिकारीहरुले जनाएका छन् । प्यालेस्टाइनी इस्लामिक जिहादले सो आक्रमणको प्रशंसा गरेपनि घटनाको कसैले जिम्मा नलिएको त्यहाँका अधिकारीहरुले जनाएका छन् ।
कब्जा गरिएको वेस्ट बैंकमा इजरायली सेनाको आक्रमणमा गत वर्ष कम्तिमा दुई सय जना प्यालेस्टाइनी लडाकू र सर्वसाधारण मारिएका थिए । इजरायल र कब्जा गरिएको क्षेत्रमा प्यालेस्टाइनीहरुले गरेको आक्रमणमा इजरायली नागरिक र सेना पनि मारिएको समाचारमा जनाइएको छ ।
अमेरिकी विदेशमन्त्री एन्टोनी ब्लिङकेनले वेस्ट बैंकको भ्रमण गर्ने भनिएको केही दिनअघि नै हिंसात्मक आक्रमण भएको हो । घटना लगत्तै सरकारी अधिकारीहरुले सो क्षेत्रको भ्रमण गरेको बताइएको छ ।
