एजेन्सी । भारतीय अभिनेता रणबीर कपूरको फिल्म ‘एनिमल’को फस्ट लुक सार्वजनिक भएको छ ।
यस फिल्मका निर्देशक सन्दीप रेड्डी भंगाले रातिको १२ बजे फिल्मको पोस्टर सामाजिक सञ्जालमा सार्वजनिक गरेका हुन् । सार्वजनिक उक्त पोस्टरमा रणबीरको अनुहार एकतर्फ मात्रै देखिएको छ । त्यसमा उनी रगतले लतपतिएका छन् । साथै उनले हालमा बन्चरो च्यापेका छन् भने उनको ओठले चुरोट च्यापेको देख्न सकिन्छ ।
फिल्मको मुख्य भूमिकामा रहेकी अभिनेत्री रश्मिका मंदानाले पनि इन्स्टाग्राम फिल्मको पोस्टर सार्वजनिक गरेकी छन् । उनले लेखेका छन्– ‘एनिमलको फस्ट लुक सार्वजनिक भएको छ । फिल्मको हिस्सा बन्न पाउँदा म निकै उत्साहित छु ।
भारतीय सञ्चार माध्यमका अनुसार यो फिल्म पाँच भाषामा प्रदर्शन हुने छ । उक्त फिल्म ११ अगस्ट २०२३ मा प्रदर्शन हुने छ । रणबीरको यो फिल्ममा भएको चरित्र उनका बाँकी फिल्मभन्दा निकै फरक हुने बताइएको छ ।
फिल्ममा रणबीर र रश्मिकाका अलावा अनिल कपूर, बबी देओल र तृप्ती डिमरीलगायतको अभिनय रहेको छ । यस फिल्ममा अभिनेता विपिन कार्कीले पनि काम गर्ने बताएका थिए । उनी धेरै पटक यस फिल्मका लागि भारत गएका पनि थिए ।
तर, पछिल्लो समय उनी फिल्मबाट बाहिरीएको र प्रसाद २ को छायांकनमा लागेको हल्ला छ ।
