काठमाडौं ।गुगलले आफ्ना अमेरिकी प्रयोगकर्ताहरूको लोकेसन हिस्ट्रीबाट गर्भपतन क्लिनिक भ्रमणहरूको डाटा हटाउने बताएको छ।
वास्तवमा, अमेरिकाको सर्वोच्च अदालतले एउटा महत्त्वपूर्ण फैसला सुनाएपछि गुगलले सो निर्णय गरेको हो। यस सुनुवाइमा सर्वोच्च अदालतले गर्भपतनलाई कानुनी मान्यता दिने पाँच दशक पुरानो फैसलालाई उल्टाएको छ। ५० वर्षअघि दिएको फैसलामा गर्भपतनको कानुनी अधिकार थियो तर अहिले अमेरिकाको सर्वोच्च अदालतले गर्भपतनको संवैधानिक अधिकारलाई खारेज गरेको छ। सर्वोच्च अदालतको यो फैसलापछि विश्वभरका मानिसहरुले विभिन्न धारणा राखिरहेका छन् ।
फैसलापछि कतिपय अमेरिकी राज्यहरुले गर्भपतनलाई अब गैर कानूनी बनाएका छन्। यस्तो अवस्थामा गुगलले प्रयोगकर्ताको गोपनीयतालाई ध्यानमा राख्दै ठूलो घोषणा गरेको छ ।
गुगलले गर्भपतन गराउने क्लिनिकहरूमा जाने प्रयोगकर्ताहरूले गोपनीयताको माग गरेमा गुगलले उनीहरूको गोपनीयताको पूर्ण ख्याल गर्ने बताएको छ। गुगलले प्रयोगकर्ताको गोपनीयतालाई सम्मान गर्दै स्थान र हिस्ट्री डाटा मेटाउने पनि बताएको छ।
गुगलले आफ्ना प्रयोगकर्ताहरूलाई विशेष ध्यान दिने
गुगलका वरिष्ठ उपाध्यक्ष जेन फिट्जप्याट्रिकले एक ब्लगमार्फत भनेका छन्, ‘यदि एक व्यक्ति गर्भपतन गर्ने क्लिनिकमा गएको गुगल प्रणालीले थाहा पाउँछ भने, प्रयोगकर्ताले स्थान छोड्ने बित्तिकै गुगलले त्यो डाटा भण्डारणबाट डिलिट गर्नेछ।’
उनकाअनुसार गुगलले प्रजनन केन्द्रहरू, दूर्व्यसन उपचार सुविधाहरू र तौल घटाउने क्लिनिकहरूसँग सम्बन्धित प्रयोगकर्ता डाटा भण्डारण गर्दैन। फिट्जप्याट्रिकले प्रयोगकर्ताहरूलाई कम्पनीले डाटा गोपनीयतालाई गम्भीर रूपमा लिने आश्वासन दिए।
