काठमाडौं । इंग्लिस फुटबल क्लबहरु म्यानचेस्टर सिटी र लिभरपुल युरोपियन च्याम्पियन्स लिग फुटबल प्रतियोगिताको सेमिफाइनलमा प्रवेश गरेका छन् ।
बुधबार राति भएको सेमिफाइनलको दोस्रो लेगको खेलमा स्पेनको एथ्लेटिको मड्रिडलाई गोलरहित बराबरीमा रोक्दै सिटी सेमिफाइनलमा प्रवेश गरेको हो । हिलो लेगमा निकालेको १–० को जितको कारण सिटीले सेमिफाइनलमा स्थान पक्का गरेको हो।
एट्लेटिकोको मैदानमा भएको दोस्रो लेगमा भने दुवै टोलीले गोल गर्न सकेनन् । दुबै टोलीले पाएका केहि अवसर गुमाएका थिए ।
उता पोर्चुगलको बेन्फिकामाथि समग्रमा ६–४ को जित निकाल्दै लिभरपुल पनि सेमिफाइनलमाप्रवेश गरेको हो । पहिलो लेगको खेल ३–१ ले जितेको लिभरपुलले बुधबार राति भएको दोस्रो लेगको खेलमा भने बेन्फिकासँग ३–३ गोलको बराबरी खेल्यो ।
खेलको २१ औं मिनेटमा इब्राहिमा कोनाटेले गोल गर्दै लिभरपुललाई सुरुवाती अग्रता दिलाएका थिए । ३२ औं मिनेटमा बेन्फिकाका गोन्कालो रामोसले गोल गर्दै खेल बराबरीमा ल्याए । ५५ औं मिनेटमा फिर्मिन्होले गोल गर्दै लिभरपुललाई पुनः २–१ को अग्रता दिलाए । ६५ औं मिनेटमा फिर्मिन्होले व्यक्तिगत दोस्रो गोल गर्दै टोलीको अग्रता ३–१ को दिलाए । ७३ औं मिनेटमा रोमन यारेमचुकले गोल गर्दै बेन्फिकालाई ३–२ को स्थितिमा ल्याए । त्यसपछि ८१ औं मिनेटमा बेन्फिकाका डार्विन नुनेजले गोल गर्दै खेल ३–३ मा ल्याए । थप समयमा दुवै टोलीबाट गोल हुन नसकेपछि खेल ३–३ गोलको बराबरीमा सकियो ।
बुधबार रातिका खेलहरुपछि युएफा च्याम्पियन्स लिग फुटबलको सेमिफाइनल समिकरण पुरा भएको छ । सेमिफाइनलमा लिभरपुलले स्पेनको भियारियालको सामना गर्नेछ भने सिटीको भिडन्त स्पेनकै रियल मड्रिडसँग हुनेछ ।
