काठमाडौं । इंग्लिस प्रिमियर लिग फुटबलमा चेल्सीले साउथह्याम्पटनमाथि आधा दर्जन गोल बर्साएको छ ।
शनिबार राति भएको खेलमा चेल्सीले साउथह्याम्पटनलाई ६–० ले पराजित हो ।
चेल्सीका टिमो वेर्नर र मेसन माउन्टले दुई दुई गोल गर्दा मार्कस अलन्सो र काई हाभर्ट्जले एक एक गोल थपे ।
खेलको आठौं मिनेटमा अलन्सोले गोल गर्दै चेल्सीलाई सुरुआती अग्रता दिलाएका थिए । १६ औं मिनेटमा माउन्टले गोल गर्दै टोलीलाई दोब्बर अग्रता दिलाए । २१ औं मिनेटमा वेर्नरले गोल गर्दै टोलीको अग्रता तेब्बर बनाए । ३१ औं मिनेटमा काईले गोल गर्दै चेल्सीलाई ४–० ले अघि बढाए ।
४९ औं मिनेटमा वेर्नरले व्यक्तिगत दोस्रो गोल गर्दै टोलीलाई ५–० को अग्रता दिलाए । त्यसपछि ५४ औं मिनेटमा माउन्टले व्यक्तिगत दोस्रो गोल गर्दै चेल्सीलाई ६-० को जित दिलाए ।
प्रिमियर लिगकै अन्य खेलहरुमा टोटनह्याम हट्सपरले एस्टन भिल्लालाई ४–० ले हराउँदा लिड्स युनाइटेडले वाट्फोर्डमाथि ३–० को जित निकाल्यो । शनिबार राति एभर्टनले म्यान्चेस्टर युनाइटेडलाई १–० ले हराउँदा ब्राइटनले आर्सनललाई २–१ ले पाखा लगायो ।
इंग्लिस प्रिमियर लिग फुटबलमा आज राति दुई शिर्ष क्लबहरु म्यानचेस्टर सिटी र लिभरपुल भिड्नेछन् । सिटीको मैदानमा हुने यो खेललाई जारी सिजनको प्रिमियर लिगको अघोषित उपाधि भिडन्तको रुपमा हेरिएको छ ।
लिगमा ३० खेलको समाप्तीसम्म म्यानचेस्टर सिटीको ७३ अंक छ भने लिभरपुलको ७२ अंक छ । तेस्रो स्थानको चेल्सीको ६२ अंक छ ।
