एजेन्सी । पाकिस्तानी प्रधानमन्त्री इमरान खानले पाकिस्तानमा राष्ट्रपति समक्ष संसद् विघटनको लागि सिफारिस गर्नुभएको छ ।
प्रधानमन्त्री खानले आइतबार राष्ट्रको नाममा सम्बोधन गर्दै राष्ट्रपति अरिफ अल्भीलाई संसद् विघटन गर्न सिफारिस गर्नुभएको हो । आफूबिरुद्ध अविश्वासको प्रस्ताव ल्याइएपछि खानले संसद बिघटनको प्रस्ताव गर्नुभएको हो । खान विरुद्ध विपक्षी दलको अविश्वासको प्रस्ताव ल्याएका हुन् । तर पाकिस्तानको राष्ट्रिय सभाका उपसभामुखले सो प्रस्ताव विदेशी षड्यन्त्रको उपज अनुसार ल्यायएको आरोप लगाउँदै त्यसलाई खारेज गर्नुभएको छ । आइतबार उप सभामुख कासिम सुरीको अध्यक्षतामा बसेको संसद् बैठकले खानविरुद्धको अविश्वासको प्रस्ताव असंवैधानिक रहेको भन्दै खारेज गरेको हो । त्यसपछि खानले राष्ट्रको नाममा सम्बोधन गर्नु भएको हो । यद्यपि औपचारिक रुपमा संसद् विघटन भने भइसकेको छैन ।
सभामुख असद वासेरविरुद्ध पनि अविश्वासको प्रस्ताव दर्ता भएपछि प्रधानमन्त्री खानले राष्ट्रपति समक्ष संसद् विघटनको प्रस्ताव गर्नु भएको अन्तर्राष्ट्रिय संचारमाध्यमले जनाएका छन् ।पाकिस्तानमा राजनीतिक संकटका बीच नयाँ राजनीतिक लडाइँ सुरु भएको छ ।
यसअघि खान सरकारका सूचना तथा प्रसारण मन्त्री फवाद चौधरीले प्रधानमन्त्री इमरान खानको हत्या हुनसक्ने सनसनीपूर्ण दाबी गर्नुभएको थियो । त्यसपछि खानको सुरक्षा बढाइएको थियो । प्रधानमन्त्री खानले अमेरिकी सहयोगमा आफूलाई पदबाट हटाउने कोसिस भइरहेको आरोप ललाउँदै आउनु भएको छ ।
पाकिस्तानमा दुई सदनात्मक संसदीय व्यवस्था छ । तल्लो सदनलाई राष्ट्रिय सभा र माथिल्लोलाई सिनेट भनिन्छ । अविश्वासको प्रस्ताव आएसँगै खानले तल्लो सदन ३४२ सदस्यीय राष्ट्रिय सभा विघटन गरेर चुनावमा जाने प्रस्ताव गर्नुभएको हो ।
