एजेन्सी । रुसले युक्रेनको दुई ठूला शहरमा अस्थायी युद्धविराम घोषणा गरेको छ ।
युक्रेनमा आक्रमण गरेको दशौं दिनमा मानवीय सहायताका लागि भन्दै रुसले शनिबार अस्थायी युद्धविराम घोषणा गरेको हो ।
रुसी समाचार संस्था तासका अनुसार मरिपोल र भोल्नोभाखाका स्थानीय बासिन्दालाई बाहिर निस्कनका लागि मानवीय करिडोर खुल्ला गरिने भएको छ ।
‘आज मार्च ५ का दिन मस्कोको समयअनुसार बिहान १० बजे युद्धविराम घोषणा गरिएको छ,’ रुसी रक्षा मन्त्रालयलाई उद्धृत गर्दै बीबीसीले लेखेको छ, ‘मरिपोल र भोल्नोभाखाका बासिन्दालाई बाहिर निस्कनका लागि मानवीय करिडोर खुला गरिएको छ ।’
दुवै देशका अधिकारीबीच भएको दोस्रो चरणको वार्तामा मानवीय सहायताका लागि करिडोर खुला गरिने सहमति भएको थियो ।
मरिपोल र भोल्नोखोभामा केही दिनदेखि दुवै पक्षबीच भीषण संघर्ष जारी रहेको थियो ।
