काठमाडौं । नेपाली कांग्रेसको जारी १४ औं महाधिवेशनमा केन्द्रीय सदस्यमा उम्मेदवारी दिएका ६० जनाले उम्मेदवारी फिर्ता लिनु भएको छ ।
उम्मेदवारी मनोनयन फिर्ताको समय भित्रमा एक सभापति, एक जना सहमहामन्त्री र ५८ जना केन्द्रीय सदस्यको उम्मेदवारले मनोनयन फिर्ता लिनु भएको हो । शनिबार १३४ पदका लागि ५४८ जनाले उम्मेदवारी दर्ता गराउनु भएको थियो ।
पार्टीका केन्द्रीय निर्वाचन समितिका अनुसार उम्मेदवारले मनोनयनपत्र फिर्ता लिइसक्नुपर्ने समय आज बिहान ११ बजेसम्म निर्धारण गरिएकोमा दुई घण्टा थप गरेर दिउँसो १ बजेसम्म कायम गरिएको थियो ।
केन्द्रीय सभापतिमा उम्मेदवारी दिएका युवराज न्यौपानेले उम्मेदवारी फिर्ता लिनु भएको हो । यस्तै, सहमहामन्त्री (थारु कोटा) तर्फका उम्मेदवार सुरेन्द्र चौधरीले पनि उम्मेदवारी फिर्ता लिनु भएको छ । अरु उम्मेदवारको नाम केही बेरमा सार्वजनिक हुने निर्वाचन समितिले जनाएको छ ।
उम्मेदवारको अन्तिम नामावली प्रकाशन आजै गरिनेछ भने मतदान भोलि मंसिर २७ गते बिहान ८ बजेदेखि हुनेछ ।
