निर्वाचन समितिका अनुसार तोकिएको कार्यसूची भन्दा तीन घण्टा वितिसक्दा पनि नेपाली काङ्ग्रेस प्रदेश १ को मतदान अझै सुरु भएको छैन । सदस्यको उम्मेदवारी दिएका श्याम खड्की, शान्तिकला तामाङ राई, जीवन नेपालीको नाम मतदाता सूचीमा नभेटेपछि मतदान समय पछि सरेको हो ।
निर्वाचन समितिका अनुसार जीवन दलित कोटा, खड्की भूगोल खुला र शान्तिकला महिला खुलाबाट उम्मेदवार थिए । मतपत्रमा उम्मेदवारको नाम छुटेको र पुनः मतपत्र छाप्नुपर्ने भए अझै केही समय मतदान हुन सक्दैन । अधिवेशन स्थलमा उम्मेदवार प्रसार प्रसारमा नेता कार्यकर्ता र समर्थकहरु जुटेका कारण चुनावी सरगर्मी बढेको छ ।
यसबाहेक अधिवेशनस्थलमा पदाधिकारीका प्रचार सामग्री जताततै राखिएको छ । मतदान बिहान ८ बजेबाट सुरु गर्ने कार्यसूची थियो । नाम समावेश गर्ने सहमति भएको उम्मेदवार खड्कीले बताए । मतदान कार्यक्रमका लागि १४ जिल्लाका प्रतिनिधिहरूलाई जिल्लागतरुपमा मतदान गर्ने व्यवस्था मिलाइएको छ ।
काङ्ग्रेसको १४ औँ महाधिवेशन अन्तर्गत १ नं प्रदेश सभापतिमा संस्थापन इतरका दुई जनाको उम्मेदवारी परेको छ । नयाँ नेतृत्वको लागि सुरु भएको अधिवेशनमा पौडेल–कोइराला समूहबाट गुरुराज घिमिरे र नेता कृष्ण सिटौला पक्षका उद्धव थापा प्रदेश सभापतिमा उम्मेदवारी दर्ता भएको हो । केन्द्रको राजनीतिबाट घिमिरे प्रदेशको नेतृत्वका लागि चुनावी मैदानमा उत्रिएका छन् ।
काँग्रेस झापाका पूर्वसभापति थापा पनि नेतृत्व हत्याउने दाउमा छन् । उनलाई संस्थापन पक्ष पार्टी सभापति शेरबहादुर देउवाको पनि साथ छ । निर्वाचनमा एक हजार सातसय प्रदेश प्रतिनिधिहरुले मतदान गर्न पाउने बताइएको छ ।
काँग्रेसको प्रदेश समितिमा एक अध्यक्ष, दुई उपाध्यक्ष, दुई महामन्त्री, तीन सह–महामन्त्री (एक महिला) सहित, हरेक जिल्लाबाट महिला १४ र खुला १४ सदस्य, प्रत्येक निर्वाचन क्षेत्रबाट ६ महिला र १३ खुला सदस्य, खस आर्यबाट सात महिला र खुला पाँच, जनजातिमा महिला सात र खुला आठ, मधेशी महिला एक र खुला एक, दलित महिला एक र खुला दुई, थारुतर्फ महिला एक र खुला एक, मुस्लिममा खुला एक, अल्पसङ्ख्यक र अपाङ्गता भएका एक सदस्य पदमा निर्वाचित हुने बताइएको छ ।
जिल्ला अधिवेशनमा प्रदेश १ का १४ मध्ये मोरङ सुनसरी, संखुवासभा, तेह्रथुम, खोटाङ र भोजपुरमा संस्थापनइतर पक्ष विजयी भएको छ । सभापति शेरबहादुर देउवा पक्षले धनकुटा, सोलुखुम्बु, ताप्लेजुङ, इलाम, पाँचथर, ओखलढुङ्गा, उदयपुर जिल्ला जितेको छ । सिटौला पक्ष झापामा विजयी भएको छ । संस्थापनइतर पक्ष प्रतिनिधिको अनुपात ६० प्रतिशत र संस्थापन पक्षको ४० प्रतिशत रहेको नेताहरु बताउँछन् ।
१३ औं जिल्ला अधिवेशनमा देउवा पक्षले प्रदेश १ का तीन जिल्ला मात्रै जितेको थियो । तर १४ औ अधिवेशनमा सिटौलाको साथ पाएपछि संस्थापन पक्षले ८ वटा जिल्लामा आफ्नो नेतृत्व स्थापित गरेको छ ।
