नेपालका सडकमा ३० टनभन्दा बढी भार बोक्न नपाइने कानुनी व्यवस्था भएपनि भारतीय ट्रकले ९० टनसम्म बोक्ने गरेपनि सरकारी निकायले बेवास्ता गरेपछि आफूहरु विरोधमा उत्रिनुपरेको पश्चिमाञ्चल यातायात व्यवसायी समितिका उपाध्यक्ष अर्जुन भुसालले बताए ।
‘कानूनले तोकेको भन्दा बढी भार बोक्न नपाइने व्यवस्था कडाइका साथ कार्यान्वयन गर्न सरकारी निकायको ध्यानाकर्षणका लागि भारतीय ट्रकलाई रोकेका हौं,’ भुसालले भने, ‘ओभरलोड बोकेका गाडीका कारण एकातिर नेपाली ट्रक व्यवसायीहरु ढुवानीको काम नपाएर खाली बस्नु परेको छ, अर्कोतिर नेपालका सडक र पुलमा ओभरलोडका कारण ठूलो क्षति भएको छ ।’
नियमअनुसार ६ चक्के ट्रकले ९.६ टन, १० चक्केले १६.२ टन, १२ चक्केले २१ टन, १४ चक्केले २५ टन र १८ चक्केले ३० टन बोक्न पाउँछन् । यही व्यवस्था अनुसार नेपालको सडकमा समेत बढीमा ३० टन बोकेका सवारी गुड्न पाउने व्यवस्था गरिएको छ । तर, भारतीय एउटै सवारीले ९६ टनसम्म सामान बोकेर आउने गरेका व्यवसायीहरु बताउँछन् । ती ट्रकमा उद्योगजन्य कच्चा पदार्थ, फलाम, मार्बल, टायल, फलफूल खाद्यान्न लगायत सामान हुने गरेको छ ।
क्षमताभन्दा दोब्बर-तेब्बर भारको सामान बोकेका सवारी साधनको भन्सार विन्दुमै भारमिलान गरी गन्तव्यमा जानुपर्ने कानूनी व्यवस्था छ । भार मिलान गर्दा मापदण्ड बढी सामान अनलोड गर्नुपर्ने हुन्छ । तर यसो नगर्दा मापदण्ड बढी भार बराबरको सामान स्वदेशी ट्रकले ढुवानी गर्न पाउने अवसरबाट वञ्चित हुन पुगेको आचार्यले बताए ।
भारबहन नियमन सम्बन्धी निर्देशिका- २०७४ अनुसार भारतबाट ओभर लोड बोकेर आउने गाडीले भन्सार विन्दुमै भारमिलान गरी सम्बन्धित ठाउँमा जानुपर्ने व्यवस्था रहेपनि कार्यान्वयन नभएको ट्राफिक प्रहरी कार्यालय रुपन्देहीका निमित्त कार्यालय प्रमुख दामोदर मल्लले बताए । ‘कानून अवज्ञा गर्दै ओभरलोड बोकेका गाडी नेपालका जुनसुकै ठाउँमा निर्वाध चलिरहेका छन्,’ मल्लले भने, ‘ट्राफिक प्रहरीले ओभरलोड बोक्नेलाई अधिकतम एक हजार ५ सय रुपैयाँ जरिवाना गराउन मात्र पाउँछ ।’ भारतीय ट्रकले ४० टन भन्दा बढी झण्डै सय टनसम्म बोक्ने गरेको मल्लले बताए ।
भैरहवा भन्सार कार्यालयका सूचना अधिकारी तिर्थराज पासवानले भने आर्थिक ऐन र भन्सार ऐनले ओभर लोड हेर्ने जिम्मेवारी आफूहरुलाई नदिएको बताए ।
