काठमाडौं । नेपाली काँग्रेसका नेता गगन थापाले स्वास्थ्य सुरक्षाका मापदण्ड पालना नगरी परीक्षा सञ्चालन गरिएको प्रधानमन्त्री शेरबहादुर देउवाको ध्यानाकर्षण गराएका छन् । मंगलबार प्रधानमन्त्री निवास बालुवाटारमा पुगेर थापाले प्रधानमन्त्री देउवाको ध्यानाकर्षण गराएका हुन् ।
देउवाले यो विषयलाई गम्भीरताका साथ लिएको थापाले बताए । साथै तत्काल पहलकदमी लिइ ठोस निर्णय लिने कुराको विश्वास समेत दिलाएको उनले बताए । वैकल्पिक माध्यमबाट परीक्षा सञ्चालन गर्न ध्यानाकर्षण गराउँदा पनि स्वास्थ्य सुरक्षाका मापदण्ड पालना नगरी परीक्षा सञ्चालन भइरहेका थापाको भनाइ छ ।
बुधबार विहान ट्वीटरमा उनले लेखेका छन्, ‘एउटै हलमा धेरै विद्यार्थी राख्दा हुने संक्रमणको जोखिम त छ नै संक्रमितलाई समेत छुट्टै व्यवस्था नहुदा उनीहरू आफ्नो अवस्था लुकाइ परीक्षा दिन बाध्य छन्।’
स्वास्थ्य मन्त्रालयले कोरोनाको तेस्रो लहरबारे बताइरहँदा अर्कोतर्फ यसरी परीक्षा सञ्चालन गरेर संक्रमणको जोखिम बढ्ने थापाले बताए । ‘स्वास्थ्य सुरक्षा मापदण्ड पालना गराऊ नत्र वैकल्पिक माध्यमबाट परीक्षा चलाऊ । तर, विद्यार्थीको भविष्य र स्वास्थ्यमाथि खेलबाड नगर,’ थापाले लेखेका छन् ।
