इनरुवा । बालात्कार आरोपी युवकलाई प्रहरीले पक्राउ नगरेको पीडितका आफन्तहरुले गुनासो गरेका छन् ।सुनसरीको इनरुवा नगरपालिका १ आदर्श टोलकी किशोरीलाई छिमेकीको विवाहमा गएको बेला स्थानीय बिजय साहले बलात्कार गरेको पीडितले आरोप लगाएका थिए ।
पीडितका परिवारले बलात्कार भएको थाहा पाउने बित्तिकै प्रहरीमा उजुरी दिएका थिए । तर प्रहरीले उजुरी लिन मानेको थिएन । उजुरी नलिनको कारण पीडक साहका परिवारले स्थानीय प्रतिनिधि र राजनीतिक दलका नेताको आडमा रहेर प्रहरीलाई उजुरी नलिन दवाव दिएको पीडित परिवारले आरोप लगाएका थिए । तर स्थानीय र स्थानीय संघसंस्थाको सहयोगमा दवाव दिएपछि पीडितको उजुरी प्रहरीले लिएको थियो ।
घटना गत बैशाख १७ गते रातिको हो । उनीहरुले १८ गते प्रहरीमा उजुरी दिएका थिए । तर प्रहरीले उजुरी नमानेपछि दोस्रो पटक उजुरी गर्दा गत मंगलबार मात्रै प्रहरीले उजुरी लिएको स्थानीय तोया गिरी बताउछिन् ।
उनले पीडितको उजुरी नलिन राजनीतिक आडमा आरोपीत साहको परिवारले प्रहरी प्रशासनलाई दवाव दिएको बताइन् । त्यस्तै उक्त घटना समाजमै मिलाउन साहको परिवारले पीडित परिवारलाई पटक-पटक पैसाकाे लाेभ देखाउदै समाजमै मिलाउन दवाव दिएको पनि उनले बताइन् ।
अहिले ठूलाे दवावपछि प्रहरीले लिएकाे उजुरीमाथि अनुशन्धान गर्न भने आनाकानी भइरहेकाे पीडित तथा स्थानीयको गुनासो छ ।
आरोपीत बिजय साह व्यापारीका छोरा भएकाले उनीहरुले सबैतिर जालझेल गरेर भएपनि पीडितलाई न्याय नदिलाउने प्रयास गरिरहेको पीडितकी दिदी सीता बताउछिन् ।
उनी भन्छिन् – ‘हामी आर्थिक रुपमा अति विपन्न हौँ । हाम्रो घरमा बोल्नसक्ने कोही छैन । बुबा हामी सानै छँदा बित्नुभयो । अहिले ममी, बहिनी र म छौँ । ममीले हामीलाई होटलमा काम सघाएर पाएको पारिश्रमिकले हामीलाई खाना खुवाउदै आउनु भएको छ।’
प्रहरीमा उजुरी नदिई घरमै मिलाउनु पटक-पटक साहका परिवारले दवाब दिएको उनी बताउछिन् । उजुरीबारे प्रहरीमा बुझ्दा कोरोनाको कारण आरोपीत युवकलाई नियन्त्रण तथा घटनाको सम्बन्धमा अनूशन्धान कठिन भएको प्रहरीले जवाफ दिने गरेको उनकाे भनाइ छ ।
उता अन्य स्थानीय भने पनि युवकलाई पक्राउ गर्न प्रहरीले तदारुकत नै नदेखाएको बताउछन् । स्थानीय एक महिला अधिकार कर्मी सरस्वती लुईटेल केसी भन्छिन्, – ‘प्रहरीले चाह्यो भने एकैछिन्मा नियन्त्रणमा लिन्छ । प्रहरीले उजुरी लिनु अघि युवक उनकै घरमा थिए। ‘ उनी थप्छिन्, ‘प्रहरी र परिवारको मिलेमतोमै युवकलाई लुकाइएको हुनसक्छ।’
कसरी भयो घटना ?
१७ गते इनरुवा नगरपालिका १ आदर्श टोलमा एक युवतीको विवाह भएको थियो । सो क्रममा ती पीडित १३ वर्षकी किशाेरी पनि विवाह हेर्न गएकी थिइन् । सो क्रममा राति ति किशाेरी विवाहमै बसेकी थिइन् । त्यही बेला ती आरोपीतले एक हजार रुपैयाँ दिने भन्दै विवाह घर भन्दा केही पर लगेर जबरजस्ती बलात्कार गरेको थिए ।
त्यसको भोलिपल्ट पीडित किशोरीले घरमा आएर परिवारलाई सुनाएपछि घटना बाहिरिएको थियो । राति साढे १ बजेतिर आफू बलात्कारको सिकार भएको ती किशोरीको भनाइ छ । घटना लगत्तै पीडितका आफन्तले प्रहरीमा उजुरी दिएको तर प्रहरीले आरोपीत युवकको आफन्तले स्थानीय जनप्रतिनिधि तथा राजनीतक दलको आडमा प्रहरीलाई उजुरी नलिन दवाद दिएको पनि आरोप लगाएका छन् ।
