काठमाडौं । नेकपा एमालेका वरिष्ठ नेताद्वय माधवकुमार नेपाल र भलनाथ खनाल समूहका सांसदहरु संघीय संसद सचिवालय सिंहदरबारमा भेला भएका छन् । पार्टीबाट राजीनामा दिने चर्चा चलिरहेका बेला आइतबार नेपाल–खनाल समूहका सांसदहरू सिंहदरबारमा जम्मा भएका छन् ।
सुरुमा सांसद जीवनराम श्रेष्ठ, मेटमणि चौधरी, पवित्रा निरौला खरेल, निरादेवी जैरू, सरला यादव, विरोध खतिवडा सिंहदरबार पुगेका थिए । त्यसपछि वरिष्ठ नेता नेपाल, नेता योगेश भट्टराई सचिवालय पुगेका थिए ।
उपस्थित भएका सांसदहरु हाल पार्टीको स्थायी कमिटी बैठकमा रहेको समाचार स्रोतले बताएको छ । स्रोतका अनुसार कैठकको निर्णयअनुसार उक्त समूह अघि बढ्नेछ ।
हाल संसद्मा एमालेका १२१ सांसद छन् । प्रधानमन्त्री केपी शर्मा ओलीले २७ गते विश्वासको मत पाउनका लागि १३६ मत चाहिन्छ ।
यदि नेपाल–खनाल समूहले राजीनामा दिए पनि नदिए पनि प्रधामन्त्री ओलीलाई विश्वासको मत पुग्दैन । यसअघि ओली नेतृत्वको सरकारमा जाने जोश जाँगर देखाएको जनता समाजवादी पार्टी पनि पछि हटेको छ ।
कांग्रेस र माओवादी केन्द्रले सुरु देखि नै ओलीको विकल्प खोज्न कसेर लागिपर्दै आएका छन्।
