काठमाडौं । सवारी चालक अनुमतिपत्र (लाइसेन्स) को नतिजा फेरबदल गरेको आरोपमा अख्तियार दुरुपयोग अनुसन्धान आयोगले यातायात व्यवस्था कार्यालय नेपालगञ्जका १९ जना कर्मचारीविरुद्ध विशेष अदालतमा भष्ट्राचारको मुद्दा दायर गरेको छ ।
गैरकानूनी रुपमा सवारी चालक अनुमतिपत्र बिक्री गरेको भन्दै उनीहरुविरुद्ध अख्तियारले बिहीबार मुद्दा दायर गरेको हो ।
कर्मचारीहरुको मिलेमतोमा लाइसेन्स नतिजा फेरबदल गरेको आरोपमा तत्कालीन कार्यालय प्रमुख तथा परीक्षा समितिका अध्यक्ष, शाखा अधिकृतद्वय सीताराम खनाल र डेकराज पोखरेललगायत १९ जनाविरुद्ध अख्तियारले मुद्दा दायर गरेको हो ।
अख्तियारले दुईपाङ्ग्रे सवारी चालक अनुमतिपत्र सम्बन्धी लिखित परीक्षाको नतिजामा परीक्षा समितिको बैठक नै नबसी आफूखुसी मौखिक आदेशमा उत्तरपुस्तिका परीक्षण गर्न लगाई लिखित परीक्षामा अनुत्तीर्ण भएका परीक्षार्थीहरुको नतिजा फेरबदल गरेको आरोप लगाएको छ।
अख्तियारले तत्कालीन कार्यालय प्रमुख तथा परीक्षा समितिका अध्यक्ष पवन सुवेदी, तत्कालीन शाखा अधिकृतद्वय सीताराम खनाल र डेकराज पोखरेल र अन्य कर्मचारीहरूका विरुद्धमा मुद्दा दायर गरेको छ ।
यसैगरी, कर्मचारी शाखा अधिकृत ध्रुवराज देवकोटा, नायब सुब्बा ललितबहादुर वली, नायब सुब्बा केशवराज डाँगी, नायब सुब्बा हुतराज पौडेल, नायव सुब्बा सतानन्द उपाध्याय (न्यौपाने), नायव सुब्बा अरुण कुमार गौतम, नायव सुब्बा धर्मदत्त चौलागाई, नायव सुब्बा डिलाराम खरेल, नायव सुब्बा ओमबहादुर बस्नेत, नायव सुब्बा गणेशमान आचार्य, नायव सुब्बा सावित्री पौडेल, खरिदार चन्द्रमणि नेपाली, खरिदार केशरकुमार चपाई, हलुका सवारी चालक ध्रुवराज अर्याल, प्रहरी सहायक निरीक्षक प्रकाश पुन र प्रहरी जवान ओम प्रसाद देवकोटाविरुद्ध पनि भ्रष्टाचार मुद्दा लागेको छ ।
अख्तियारले उनीहरुमाथि भ्रष्टाचार निबारण ऐन, २०५९ को दफा १३ बमोजिम सजाय हुने मागदाबी गरेको छ ।
