एजेन्सी । अमेरिकाको जर्जियाका तीन अलग–अलग स्पामा गोलीबारीमा कम्तीमा ६ जना एसियाली महिलासहित ८ जना मारिएका छन् ।
अटलान्टाको उत्तरमा रहेको सबअर्ब एकवर्थको एक मसाज पार्लरमा चार जना मारिएका छन् भने सोही शहरको अन्य दुई स्पामा चार व्यक्तिमाथि गोली प्रहार भएको हो । उनीहरूलाई एसियाली भएकै कारण मारिएको हुनसक्ने अनुमान गरिएको छ ।
तीनवटै गोलीबारीमा संलग्न भएको आरोपमा प्रहरीले २१ वर्षीय रोबर्ट आरोन लाङ्ग्सलाई पक्राउ गरेको छ । उनी जर्जियाको उडस्टकमा बस्दै आएका थिए । घटना गराउनुको कारण प्रहरीले अहिलेसम्म पत्ता लगाउन सकेको छैन ।
पहिलो गोली चेरोकी काउन्टीस्थित यंग्स एसियन मसाज पार्लरमा अमेरिकी समयअनुसार साँझ ५ बजे भएको थियो । प्रहरीले घटनास्थलमा दुई र उपचारका क्रममा लगेका तीनमध्ये दुईको मृत्यु भएको जानकारी दिएको छ । मृत्यु हुनेमा दुई एसियाली महिला थिए भने दुई श्वेत अनुकारको महिला र पुरुष थिए ।
