गार्टनरको पछिल्लो रिपोर्ट अनुसार आइफोन १२ सिरिजको उच्च माग तथा बिक्रीकै कारण सामसुङलाई पछि पार्दै एप्पल विश्वको सबैभन्दा ठूलो स्मार्टफोन ब्राण्ड बन्न सफल भएको छ ।
रिपोर्ट अनुसार पछिल्लो त्रैमासिकमा एप्पलले विश्व बजारमा ८ करोड स्मार्टफोन बिक्री गर्न सफल भएको छ । त्यो संख्या अरु जुनसुकै स्मार्टफोन ब्राण्डको भन्दा धेरै हो । अर्को उल्लेखनीय कुरा के भने यो पटक सन् २०१६ यता पहिलोपटक एप्पलले सामसुङ भन्दा बढि स्मार्टफोन बिक्री गर्न सफल भयो ।
उक्त त्रैमासिकमा आइफोन बिक्रीको दरमा १४.९ प्रतिशतले बढोत्तरी भयो । जबकि सोही अवधिमा सामसुङका स्मार्टफोनको बिक्रीदर चाहीँ ११.८ प्रतिशतले घटेको छ ।
धेरै खाले स्मार्टफोनहरु बजारमा ल्याउने सामसुङको तुलनामा एप्पलले निश्चित मोडेलका आइफोन मात्रै बजारमा ल्याउँदा समेत आइफोन १२ र आइफोन ११ समेतको उच्च बिक्रीदरका कारण एप्पलले समग्रमा ८ करोड गोटा आइफोन बेच्ने कोशेढुंगा पार गरेको हो ।
गार्टनरका अनुसार पहिलो फाइभ जी आइफोनको रुपमा रहेको आइफोन १२ लञ्च गरेकाले नै सन् २०२० को चौथो त्रैमासिकमा दोहोरो अंकको वृद्धिदर हासिल गर्न सफल भएको हो ।
सन् २०२० को चौथो त्रैमासिक अवधिमा दोस्रो स्थानमा झरेपनि सन् २०२० को समग्र वर्षको बिक्रीको हिसाबले चाहीँ सामसुङ पहिलो स्थानमै रहेको छ । रिपोर्ट अनुसार अघिल्लो वर्ष सामसुङले चिनिया स्मार्टफोन ब्राण्डहरु साओमी, ओप्पो तथा भिभो लगायतकासँग कडा प्रतिस्पर्धा गर्नुपर्यो ।
सन् २०२० मा समग्रमा सामसुङको स्मार्टफोन बिक्रीदरमा १४.६ प्रतिशतको गिरावट आयो । यस वर्ष टप फाइभ स्मार्टफोन ब्राण्डमध्ये सकारात्मक वृद्धिदर हासिल गर्न सफल भएका स्मार्टफोनमा केवल एप्पल र साओमी मात्र रहेका छन् । सन् २०२० मा एप्पलका आइफोनको बिक्रीमा समग्रमा वार्षिक ३.३ प्रतिशतको वृद्धिदर हासिल भयो ।
गार्टनरका अनुसार सन् २०२० को चौथो त्रैमासिकमा विश्वमा स्मार्टफोनको बिक्रीमा ५.४ प्रतिशतले गिरावट आयो । जबकि समग्र वर्षभरमा चाहीँ १२.५ प्रतिशतको गिरावट देखिएको थियो ।
रिपोर्ट अनुसार फाइभ जी स्मार्टफोन र सस्तो तथा मध्यम मूल्यका स्मार्टफोनको बिक्रीदर उच्च भएकै कारण चौथो त्रैमासिकमा बजारको गिरावटमा केही कमी आएको हो । एजेन्सीको सहयोगमा
