एजेन्सी । अमेरिकी राष्ट्रपति डोनाल्ड ट्रम्पले सत्ता हस्तान्तरण व्यवस्थित रूपले हुने बताउनुभएको छ । अमेरिकी संसद भवनमा भएको हमला, जो बाइडन र कमला ह्यारिसको जितलाई संसदले सदर गरेपछि ट्रम्पले सत्ता हस्तान्तरण व्यवस्थित रूपले हुने बताउनुभएको हो । यद्यपि उहाँले निर्वाचनमा भएको धाँधलीको बारेमा भने आफ्नो भनाइलाई कायमै राख्नुभएको छ ।
‘निर्वाचनको नतिजाबाट म पूर्णरूपमा असहमत छु । यो कुराको प्रमाण पनि छ । त्यसको बावजुद २० जनवरीमा व्यवस्थित तरिकाले सत्ता हस्तान्तरण हुनेछ’, प्रवक्ताको ट्वीटर ह्याण्डलबाट ट्रम्पले भन्नुभएको छ । ट्वीटरमा अमेरिकी निर्वाचनका बारेमा हिंसा फैलाउने अभिव्यक्ती दिएको भन्दै उहाँको ट्वीटर ह्याण्डल १२ घण्टाको लागि प्रतिबन्ध गरिएको छ ।
उहाँले अगाडि भन्नुभएको छ, ‘वैध मतको मात्र गणना हुनको लागि हामी आफ्नो लडाईं जारी राख्छौं । अमेरिकी राष्ट्रपतिको इतिहासमा यसको साथमा सबैभन्दा महान पहिलो कार्यकालको अन्त्य हुनेछ, तर अमेरिकालाई दोश्रोपटक महान बनाउनका लागि हाम्रो लडाईंको यो त सुरुवात मात्र हो ।’
ट्रम्पको चुनावी टीमले नोभेम्बरमा भएको चुनावको नतिजाप्रति असन्तुष्टि जनाउँदै ६० भन्दा बढी स्थानमा रिट दर्ता गरेपनि त्यसलाई खारेज गरिएको थियो ।
