काठमाडौं । राष्ट्रिय प्रजातन्त्र पार्टीका अध्यक्ष कमल थापाले राजसंस्था र हिन्दुराष्ट्र पुनःस्थापनाका लागि भएको आन्दोलनमा राप्रपाको समर्थन रहने बताएका छन् ।
सोमबार पार्टी कार्यालयमा भएको झण्डोत्तोलन तथा चुनाव चिन्ह अनावरण समारोहमा थापाले स्वःस्फूर्त रुपमा देशभर भएको आन्दोलनमा आफूहरुको ऐक्यबद्धता रहेको बताए । जनताले राजालाई ल्याउनुपर्ने भन्दै उनले अघि भने, ‘राजा आऊ देश बचाउ होइन, जनता आऊ राजा ल्याऊ देश बचाऔँ भनौं ।’
अर्का अध्यक्ष पशुपति शमशेर जबराले सरकारले सिन्को पनि नभाँचेको आरोप लगाए । ‘मुलुक अहिले नराम्रो अवस्थामा छ । दुई तिहाई सरकार दुई वर्षमा दिशाहीन उपलब्धिहीन बाटोमा छ । सरकारले सिन्का भाच्न सकेको छैन,’ उनले भने, ‘सरकारसँग केही ठोस बाटो छैन । काण्डको नाम लिन साध्य छैन ।’
यस्तै अर्का अध्यक्ष डा.प्रकाशचन्द्र लोहनीले राष्ट्रपति विद्यादेवी भण्डारी एउटा पार्टी र त्यसकमा पनि एउटा समूहको जस्तो मात्र देखिएको आरोप लगाएका छन् । ‘नेपालका लागि, संवैधानिक राजतन्त्रको आवश्यकता रहेको भन्दै उनले भने, ‘राष्ट्रपति एउटा पार्टीमा एउटा गुटका भए । सरकारको आफ्नालाई मात्र हेर्यो ।’
पूर्वप्रधानमन्त्री लोकेन्द्र बहादुर चन्दले पार्टीले जे निर्णय गर्छ त्यसमा आफ्नो सहमति हुने बताए ।
चारुमतीस्थित पार्टी कार्यालयमा पार्टीको झण्डोत्तोलन पूर्व प्रधानमन्त्री लोकेन्द्रबहादुर चन्दले गरेका थिए भने चुनाव चिन्ह अध्यक्ष त्रयकमल थापा, पशुपति शम्शेर जबरा र डा. प्रकाशचन्द्र लोहनीबाट सार्वजनिक गरेका छन् ।
