स्पेनिस ला लिगाअन्तर्गत विवादस्पद खेलमा साविक विजेता रियल म्याड्रिडले जित हात पारेको छ रियलले पुनरागमन जित निकाल्ने क्रममा रियल बेटिसलाई ३-२ गोलले पराजित गरेको हो। १४ मिनेटमा भेल्भेर्डको गोलबाट रियलले खेलमा पहिले अग्रता लिएको थियो। ३५ मिनेटमा मन्डीले बेटिसका लागि बराबरी गोल फर्काए। दुई मिनेटपछि बेटिसले खेलमा अग्रता लिन सफल भयो। विलियम कार्भाल्होले ३७ मिनेटमा गोल गर्दै टिमलाई २-१ ले अघि बढाए। 

दोस्रो हाफ सुरु भएको तेस्रो मिनेटमा बेटिसले आत्मघाती गोल गर्दा रियललाई फाइदा पुग्यो। बेटिसका सोउजा जुनियरले ४८ मिनेटमा आफ्नै पोस्टमा गोल गरेपछि खेल २-२ को बराबरीमा आयो। 

६७ मिनेटमा उनै सोउजाले रातो कार्ड पाउदा बेटिस १० खेलाडीमा सीमित भयो। भिएआरमार्फत उनलाई रातो कार्ड दिइएको थियो। रियलका लुका मोड्रिचलाई फल गरेपछि रेफ्रीले भिएआर प्रयोग गरेका थिए। ८२ मिनेटमा रियललाई भिएआरमार्फत नै पेनाल्टी दिने निर्णय गरियो। रियल बेटिसका मार्क बर्ट्राको पखुरामा बलले लागे पनि ह्यान्ड लिइएको भन्दै बेटिसले विरोध गरेको थियो। जसका कारण खेल विवादित बन्यो। प्राप्त पेनाल्टीमा सर्जियो रामोसले गोल गर्दा रियलले ३-२ ले अग्रता लियो। 

सिजनमा रियलको यो पहिलो जित हो। यसअघि पहिलो खेलमा रियललाई रियल भलडोलिडले बराबरीमा रोकेको थियो। लिगमा बार्सिलोनाले आइतबार आफ्नो पहिलो खेलमा भिल्लारियलसँग खेल्दैछ।