काठमाडौं । प्रतिनिधि सभाको बैठकमा प्रधानमन्त्रीले सम्बोधन गर्ने महत्वपूर्ण कार्यसूची रहेकाले सम्भावित अवरोध हटाएर सदनको कारबाहीलाई सहज बनाउन सभामुख देवराज घिमिरेले सक्रियता बढाएका छन् । यसै क्रममा उनले आज बिहान प्रमुख दलका प्रमुख सचेतकहरूसँग निर्णायक छलफल बोलाएका छन् ।
सभामुख घिमिरेले बिहान साढे १० बजे संघीय संसद् भवन नयाँबानेश्वरस्थित आफ्नै कार्यकक्षमा छलफल राखेका हुन् । छलफलमा एमालेका महेश बर्तौला, कांग्रेसका श्याम घिमिरे र माओवादी केन्द्रका हितराज पाण्डेलाई बोलाइएको छ । आज ११ बजे बस्ने प्रतिनिधि सभाको बैठकलाई सञ्चालन गर्ने र दलहरूबीच सहमतिको वातावरण बनाउन बैठक बोलाइएको हो ।
आजको बैठकमा प्रधानमन्त्री केपी शर्मा ओलीले सम्बोधन गर्ने कार्यसूची रहेको छ । प्रधानमन्त्रीको सम्बोधन र अन्य महत्वपूर्ण कार्यसूचीहरू रहेकाले सदनमा अवरोध उत्पन्न हुन नदिन सभामुखले पूर्वतयारी स्वरूप दलका नेताहरूसँग संवाद थालेका हुन् ।
