काठमाडौं । अमेरिकी राष्ट्रपति डोनाल्ड ट्रम्पसँगको संवाद तनावपूर्ण बनेको २४ घण्टा नबित्दै युक्रेनी राष्ट्रपति भोलोदोमिर जेलेन्स्कीले बेलायती प्रधानमन्त्री केइर स्टार्मरसँग अर्थपूर्ण भेटवार्ता गरेका छन् ।
डाउनिङ स्ट्रिटमा भएको छलफलपछि बेलायतले युक्रेनलाई २.८ अर्ब अमेरिकी डलर ऋण उपलब्ध गराउने सम्झौतामा हस्ताक्षर गरेको छ । जेलेन्स्कीले बेलायतको समर्थनप्रति कृतज्ञता व्यक्त गर्दै उक्त रकम हतियार खरिदमा प्रयोग गरिने बताए । यसै क्रममा उनले बेलायती राजा चार्ल्ससँग पनि भेट्ने कार्यक्रम रहेको छ ।
बेलायतले युक्रेनलाई निरन्तर सहयोग गर्ने प्रतिबद्धता जनाउँदै प्रधानमन्त्री स्टार्मरले ‘युनाइटेड किङ्गडमभरिबाट युक्रेनलाई पूर्ण समर्थन छ’ भनेका छन् । जवाफमा, जेलेन्स्कीले कठिन समयमा युक्रेनका लागि बेलायत जस्तो सच्चा मित्र रहेकोमा खुशी व्यक्त गरे ।
अमेरिकामा भने जेलेन्स्कीले अप्ठ्यारो परिस्थितिको सामना गर्नुपर्यो । ह्वाइटहाउसमा राष्ट्रपति ट्रम्प र उपराष्ट्रपति जेडी भान्ससँगको वार्ता विवादास्पद बन्यो । तीव्र असहमतिको कारण अमेरिका-युक्रेनबीच हुन लागेको खनिज सम्झौता रद्द गरियो, जसले दुई देशबीचको सम्बन्ध थप जटिल बनाएको विश्लेषकहरूले बताएका छन् ।
यसैबीच, बेलायती प्रधानमन्त्री केइर स्टार्मरले अमेरिका र युरोपबीच पुलको रूपमा भूमिका निर्वाह गर्ने प्रयास गरिरहेका छन् । आइतबार उनले लण्डनमा युरोपेली नेताहरूको बैठक आह्वान गरेका छन्, जसमा रुस-युक्रेन युद्ध अन्त्यको प्रयास तथा युरोपेली सुरक्षासम्बन्धी विषयमा छलफल हुनेछ ।
ह्वाइटहाउसमा अपमानित महसुस गरेका जेलेन्स्कीलाई बेलायतमा गर्मजोशीपूर्ण स्वागत गरिएको छ, जसले बेलायत-युक्रेन सम्बन्ध अझ प्रगाढ भएको संकेत गर्छ ।
