काठमाडौं । नेपाल प्रहरीका लागि यस वर्ष निरीक्षक (इन्स्पेक्टर) र सहायक निरीक्षक (असइ) भर्ना गर्दा न्यून संख्यामा आवेदन परेका छन् । ६४ जना इन्स्पेक्टरको माग पूरा गर्नका लागि जम्मा दुई हजार ३०५ आवेदन परेको छ भने २५६ जना असइका लागि १५ हजार ९२१ जनाको मात्र आवेदन परेको छ । यो संख्या अन्य सरकारी सेवाका भर्नामा आउने आवेदनको तुलनामा निकै न्यून हो ।
गत वर्ष इन्स्पेक्टरमा ९६ जनाको माग हुँदा २ हजार ७९३ आवेदन परेका थिए भने २६० जना असइका लागि १९ हजार ९३२ जनाले आवेदन दिएका थिए । आवेदन दर घट्नुलाई सुरक्षा सेवातर्फको आकर्षणमा कमी आएको संकेत मान्न सकिन्छ ।
प्रहरी प्रवक्ता दानबहादुर कार्कीले सुरक्षा सेवामा आकर्षण घट्दै गएको बताउँछन् । उनी भन्छन्, ‘सुरक्षा सेवाको जागिर जोखिमपूर्ण र शारीरिक परिश्रम गर्नुपर्ने भएकाले धेरैले आकर्षण नदेखाएको जस्तो देखिन्छ ।’
नयाँ पुस्तामा विदेशमा जाने मोह बढ्नु, प्रहरी सेवामा हुने कठिन ड्युटी, र न्यून सेवा-सुविधाका कारण पनि यो पेशा कम आकर्षक बनेको प्रहरी विभागको विगतका अध्ययनले देखाएका छन् । नेपाल प्रहरीले आवेदन संख्या बढाउन विभिन्न उपाय अपनाए पनि, परिणाम प्रभावकारी हुन सकेको छैन । बरु, भर्ना भएकाहरूले पेन्सनको अवधि नपुग्दै जागिर छोड्ने प्रवृत्ति बढ्दै गएको छ ।
निजामती सेवातर्फ भने हरेक वर्ष उच्च आवेदन दर देखिँदै आएको छ । प्रहरी मात्र होइन, सबै सुरक्षा निकायमा आवेदन दर घट्दै गएकाले, युवामा सुरक्षा सेवाप्रतिको आकर्षण कमजोर हुँदै गएको प्रहरी अधिकारीहरू बताउँछन् । उनीहरूका अनुसार क्षमतावान् युवाहरूले सुरक्षा सेवामा रुचि नदेखाउँदा भविष्यमा संगठनको प्रभावकारितामा असर पर्नसक्ने चिन्ता पनि बढेको छ ।
