काठमाडौं । नेपाल प्रहरीको केन्द्रीय अनुसन्धान ब्यूरो (सिआइबी)ले ६१ किलो सुन तस्करी प्रकरणमा रायसहितको अनुसन्धान प्रतिवेदन आज जिल्ला सरकारी वकिल कार्यालयमा बुझाउने भएको छ ।
सरकारी वकिलमा बुझाउने प्रतिवेदन लेखन कार्य हिजो मंगलबार साँझ सकिएकाले आज बुझाउने तय भएको सिआइबीले जनाएको छ ।राय प्रतिबेदनमा आरोपीविरुद्ध संगठित अपराध, सुन चोरी पैठारी र राष्ट्र बैंक ऐन अन्तर्गत चार वटा कसुरमा मुद्दा चलाउन सिफारिस गरिएको बुझिएको छ ।
राय प्रतिबेदन बुझेपछी सरकारी वकिललाई तीन दिन मिसिल अध्ययनको समय रहने छ । उक्त प्रकरणमा अहिलेसम्म प्रहरीले ३१ जनालाई पक्राउ गरेकोमा स्वास्थ्यका कारण एक जना हिरासत बाहिर रहे पनि ३० जना प्रहरी नियन्त्रणमै छन् ।
पक्राउ परेकाहरुमा भन्सार कार्यालयका कर्मचारीसहित नेपाल, भारत र चिनियाँ नागरिक रहेका छन् । उक्त प्रकरणमा भन्सार एजेन्ट र सुन व्यापारीसमेत मुछिएका छन् । गत साउन ३ गते राजस्व अनुसन्धान विभागको टोलीले हङकङबाट ब्रेक शुमा राखेर ल्याएको सुन विमानस्थल भन्सारबाट बाहिरिएपछि सिनामंगलबाट बरामद गरेको थियो ।
