काठमाडौं । नेपाली कांग्रेसका महामन्त्री एवं सांसद विश्वप्रकाश शर्माले हरेक विषयमा संसद अवरोध गर्ने परम्पराको अन्त्य हुनुपर्ने बताउनु भएको छ ।
मंगलबार प्रतिनिधि सभाको बैठकमा बोल्दै सांसद शर्माले संसद् अवरोध हुँदा जनताको आवाज राख्न नपाइएको भन्दै गुनासो गर्नुभयो । उहाँले संसदमा ‘नियमापत्ति’ र ‘आपत्ति’ भन्ने शब्दको व्याख्यालाई गहिरोसँग बुझिदिन पनि आग्रह गर्नुभयो ।
नेकपा एमालेले सुन तस्करी प्रकरणमा छानविन समिति बनाउन माग गरिरहेको बेला शर्माले त्यसप्रति लक्षित गर्दै नेपालको संसदीय राजनीतिमा संविधानले बलियो बनाएका संस्थाहरूप्रति अविश्वास गर्ने र राजनीतिक सहमतिमा बनेका छानबिनहरूप्रति विश्वास गर्ने गलत अभ्यास भइरहेको उल्लेख गर्नुभयो । बरु संविधानले बलियो बनाएका संस्थाप्रति विश्वासको संकट घट्नुका कारणमाथि छानबिन गर्नुपर्ने परिस्थिति आएको उहाँको भनाई छ ।
महामन्त्री शर्माले देशको विभिन्न स्थानमा बाढी पहिरोले जनजीवन अस्तव्यस्त भएको भन्दै त्यसमा आवश्यक कदम चाल्न सरकारको ध्यानाकर्षण गराउनुभयो ।
