काठमाडौं । नेपाली कांग्रेसका महामन्त्री गगनकुमार थापाले पार्टीमा परम्परागत गुट सकिएको बताएका छन् ।
पार्टीभित्र सुधार चाहने र सुधार नचाहने गुट मात्रै रहेको थापाले बताए । नेपाल प्रेस युनियन उपत्यका तथा प्रतिष्ठान प्रदेशको प्रथम अधिवेशनको उद्घाटनमा बोल्दै महामन्त्री थापाले भने, नेपाली कांग्रेस बदल्ने र नेपाली कांग्रेसलाई सुधार गर्न नचाहने गुट छ । परिवर्तन नचाहनेलाई कमजोर बनाउँदै जाऔं ।
सभापति शेरबहादुर देउवाको कार्यशैलीलाई अब नसहने थापाले चेतावनी पनि दिएका छन् । सभापतिका कारणले नेपाली कांग्रेसका विषयमा प्रश्न उठ्ने अवस्था बनेको थापाको जिकिर रहेको छ ।
उनले भने, ‘टुल टुल हेरेर बसिन्न् । नेपाली कांग्रेस बदलिन्छ । संघर्ष गर्ने हो ।’ निर्णय गर्ने पूर्ण अधिकार सभापतिलाई विधानले दिएकाले पनि समस्या भएको उनको तर्क रहेको छ ।
नेपाली कांग्रेस सम्मिलित सरकारले एक पछि अर्को गलत क्रियाकलाप गरिरहेको थापाले बताएका छन् । नागरिक उन्मुक्ति पार्टीका नेता रेशम चौधरीलाई आममाफी, नागरिकता विधेयकको प्रमाणीकरण प्रक्रिया, प्रदेशमा मन्त्रालय टुक्राउनु, सांसद विकास कोषको व्युँताउने कार्य गलत भएको थापाले बताएका छन् ।
पार्टी सभापतिको बलमा सरकारले गरेका निर्णयहरु पछि मात्रै थाहा पाएको थापाले बताएका छन् ।
केन्द्रदेखि स्थानीय तहसम्म नेपाली कांग्रेस सरकारमा भए पनि २०८४ सालको चुनाव हेरेर अहिले निराशा कार्यकर्तामा देखिएको उनले बताएका हुन् । ‘वडा, पालिका, प्रदेशमा नेपाली कांग्रेसले जितेको छ । आजको दिनमा नेपाली कांग्रेस सबै भन्दा ठूलो राजनीतिक पार्टी हो । साढे चार वर्ष चुनावपछिको चुनाव हार्छौं भनेर चिन्ता व्यक्त गर्नुभएको छ,’ थापाले भने, ‘साथीहरुले सबै सकियो, गयो गयो भनिरहेको सुन्छु । सबैतिर जितेर पनि किन यस्तो भएको?
समस्या हल गर्ने र भविष्यको आशा देखाउने विश्वास गुमाएकाले नेपाली कांग्रेसका कार्यकर्तामा निराशा छाएको थापाले बताएका छन् । ‘आजको समस्या नेपाली कांग्रेसले हल गर्छ भन्ने नागरिकलाई लागेको छैन । भोट पाएका छौं, विश्वास गुमाएका छौं,’ उनले भनेका छन् ।
