काठमाडौँ । गण्डकी प्रदेशमा आज नेपाली कांग्रेसका नेता सुरेन्द्रराज पाण्डे बहुमतको सरकारको मुख्यमन्त्री नियुक्त हुँदै छन् । प्रदेश प्रमुख पृथ्वीमान गुरुङले संविधानको धारा १६८ को उपधारा २ बमोजिम बहुमतको सरकार गठनका लागि आज अपराह्न ४ बजेसम्मको समय दिएका छन् । पुस २५ गते नेकपा माओवादी, राप्रपासहितको समर्थनमा मुख्यमन्त्री नियुक्त भएका नेकपा एमालेका खगराज अधिकारी सरकार वैशाख ९ गते ढलेपछि गण्डकीमा नेपाली कांग्रेस-नेकपा माओवादीको सरकार बन्न लागेको हो ।
केन्द्रमा प्रधानमन्त्री पुष्पकमल दाहालले राष्ट्रपति निर्वाचनमा सत्ता समीकरण बदलेपछि गण्डकीमा नेकपा एमाले सरकारबाट नेकपा माओवादी मन्त्रीले राजीनामा दिँदै चैत १० गते समर्थन फिर्ता लिएका थिए । कुनै दलले समर्थन फिर्ता लिएमा १ महिनाभित्र विश्वासको मत लिनु पर्ने संवैधानिक व्यवस्थाअनुसार अधिकारीले संसदबाट वैशाख ९ गते विश्वास गुमाएका थिए ।
संविधानको धारा १६८ को उपधारा २ बमोजिम दुई वा दुईभन्दा बढी दल मिलेर बनेको सरकार ढलेपछि सोही बुँदाअनुसार सरकार गठनका लागि आह्वान गर्ने कि उपधारा ३ बमोजिम ठूलो दलबाट मुख्यमन्त्री नियुक्त गर्ने अन्योल थियो । कानुनी परामर्शपछि प्रदेश प्रमुख गुरुङले १२ गते उपधारा २ बमोजिम बहुमतको सरकार गठनका लागि तीन दिनको समय दिएर आह्वान गरेका थिए ।
गण्डकीमा शीर्ष तहमै नेपाली कांग्रेस-नेकपा माओवादी आलोपालो गर्ने सहमति भएको नेताहरुले बताएका छन् । पहिलो चरणमा नेपाली कांग्रेसले नै मुख्यमन्त्री पाउने पक्का भइसकेको छ । नेपाली कांग्रेस र नेकपा माओवादी पालैपालो काठमाडौं पुगेर सहजीकरण गरिदिन आग्रह थिए । नेकपा माओवादीले कम्तिमा कति समयपछि मुख्यमन्त्री पालो पाउने ग्यारेन्टी गर्न, ७ मन्त्रालयमध्ये ३ मन्त्रालय पाउनुपर्ने माग गर्दै अझै केन्द्रको निर्णय कुरिरहेको छ । शीर्ष नेताहरुले अझै निर्णय गरिसक्नुभएको छैन । मुख्यमन्त्री कति समय, मन्त्रालय कति भन्ने स्पष्ट निर्णय केन्द्रबाटै दिने भन्नुभएको छ । केन्द्रकै निर्णय निर्देशन कुरेर बसेका छौं, केन्द्रको निर्णय आएको १ घन्टाभित्र सबै प्रक्रिया सकिन्छ,’नेकपा माओवादी संसदीय दलका नेता हरिबहादुर चुमानले भने, ‘कम्तिमा लिखितै होस् भन्ने हो, नत्र यहीँ लिखितै गरेरमात्र सरकारमा जान्छौं ।
गण्डकीमा नेपाली कांग्रेसका २७,नेकपा माओवादीका ७ सभामुखबाहेक सदस्यले ६० सदस्यीय प्रदेश सभामा सरकार बनाउन सहज बहुमत पुग्छ । मनाङबाट स्वतन्त्र रुपमा सर्वसम्मत चुनावले जितेर नेकपा एकीकृत समाजवादी प्रवेश गरेका राजीव गुरुङ दीपक मनाङ पनि गठबन्धनमा हुँदा ३५ सदस्य पुग्छ । मुख्यमन्त्री दाबी गरिरहेको नेकपा माओवादीले पहिलो चरणमा नपाए पनि ७ मध्ये ३ मन्त्रालय पाउनुपर्ने दाबी पनि गरिरहेको छ । नेकपा माओवादीबाट मुख्यमन्त्री नै बन्ने भएकाले चुमान मन्त्री नबन्ने र यसअघि नै पर्यटनमन्त्रीबाट राजीनामा दिएका रेशमबहादुर जुग्जाली भने मन्त्री भबन्ने पक्का छ ।
प्रमुख सचेतकबाट छोडेर गोरखाकी सुशीला सिम्खडा मन्त्री बन्ने चर्चा पनि नेकपा माओवादीमा छ । ३ मन्त्रालय पाउँदा नेकपा माओवादीको चुनाव चिह्न लिएर जितेका बाबुराम भट्टराई नेतृत्वको नेपाल समाजवादी पार्टीका फणिन्द्र देवकोटाले पनि मन्त्री हुने मौका पाउने सम्भावना छ । नेपाली कांग्रेसभित्र मन्त्रीका आकांक्षी झनै धेरै हुँदा दलका नेता पाण्डेलाई मिलाउनै सकस छ । पाण्डेले पार्टी सभापति देउवाले कसलाई मन्त्री बनाउने भनेर निर्णय गरेर पठाएअनुसार गर्ने सांसदहरुलाई बताइरहेका छन् ।
आज मुख्यमन्त्रीसँगै नेपाली कांग्रेसबाट १ जना र नेकपा माओवादीबाट १ जना गरी ३ जनाले शपथ लिने तयारी भइरहेको नेपाली कांग्रेसका एक सांसदले बताएका हुन् ।
