काठमाडौं । यही वैशाख १० गते बारा क्षेत्र नम्बर २, चितवन क्षेत्र नम्बर २ र तनहुँ क्षेत्र नम्बर १ मा हुने उपनिर्वाचनका लागि प्रचार प्रसार गर्ने आज बिहीबार अन्तिम दिन हो । बिहीबार नै राति १२ बजेपछि मौन समय सुरु हुने भएकाले दलहरु बिहीबार दिनभर अन्तिम प्रचारमा जुटेका छन् ।
मतदान सुरू हुनु ४८ घण्टा अघिदेखि मौन अवधि सुरू हुने भएकाले राजनीतिक दल तथा उम्मेदवारहरुलाई बिहीबार दिनभर मात्रै प्रचार प्रसारको समय रहेको हो ।
मौन अवधि सुरू भएपछि कुनै पनि माध्यमबाट प्रचार प्रसार गर्न नपाइने निर्वाचन आयोगले जनाएको छ । राजनीतिक दल तथा उम्मेदवारहरुले बिहीबार दिनभर सबै शक्ति चुनाव प्रचारमा लगाउने भएका छन् ।
सत्ता गठबन्धनले बिहीबार बारा क्षेत्र नम्बर २ मा कार्यक्रम गर्ने भएको छ । प्रधानमन्त्री पुष्पकमल दाहाल “प्रचण्ड”नेपाली कांग्रेसका सभापति शेरबहादुर देउवा, नेकपा एकीकृत समाजवादीका अध्यक्ष माधव नेपाललगायतका नेताहरु गठबन्धनका उम्मेदवार उपेन्द्र यादवको चुनाव प्रचार गर्न बारा जाने भएका छन् ।
गठबन्धनका शीर्ष नेताहरु बाराबाट चितवनको क्षेत्र नम्बर २ मा हुने चुनावी सभामा सहभागी हुन जाने कार्यक्रम रहेको छ । चितवनको चुनावी सभामा नेपाली कांग्रेस महामन्त्रीद्वय गगनकुमार थापा र विश्वप्रकाश शर्मा तथा पूर्व प्रधानमन्त्री डा. बाबुराम भट्टराइ पनि सहभागी हुने कार्यक्रम रहेको छ ।
यस्तै, प्रतिपक्षी नेकपा एमालेले पनि बिहीबार शीर्ष नेताको उपस्थितीमा बारामा चुनावी सभाको आयोजना गर्दैछ । सभालाई नेकपा एमाले अध्यक्ष केपी शर्मा ओली, वरिष्ठ उपाध्यक्ष इश्वर पोखरेल, सचिव रघुवीर महासेठलगायतले सम्बोधन गर्ने छन् ।
