काठमाडौं । नेकपा एमालेका अध्यक्ष केपी शर्मा ओलीले वर्तमान सरकार संकटमा पर्छ जस्तो आफूलाई नलागेको बताउनुभएको छ ।
राष्ट्रपति निर्वाचन र गृहमन्त्री चयनको विषयले सत्ता साझेदार दलहरुबीच खटपट परिरहेका बेला अध्यक्ष ओलीले यही कारण सरकार संकटमा नपर्ने बताउनुभएको हो ।
विराटनगर विमानस्थलमा उहाँले मुलुकको शासन प्रणालीमै अस्थिरता रहेकाले प्रजातन्त्र प्राप्तिपछिका सरकार पूर्ण कार्यकाल नचलेको जिकिर गर्नुभयो । राष्ट्रपति निर्वाचनको सन्दर्भमा नेकपा माओवादी केन्द्र नेपाली कांग्रेसतिर ढल्किएको हो ? भनेर राखिएको जिज्ञासामा ओलीले नेकपा माओवादी केन्द्रका केही नेताहरुले त्यसरी बोले पनि आफूलाई त्यस्तो नलागेको बताउनुभएको थियो ।
गृह मन्त्रालय राष्ट्रिय स्वतन्त्र पार्टीलाई नै दिनुपर्ने भन्दै उहाँले सरकार गठनको बेला सत्ता साझेदार दलबीच गृह मन्त्रालय रास्वपालाई दिने सहमति भएकाले पालना हुनुपर्ने बताउनुभयो । उहाँले राष्ट्रिय स्वतन्त्र पार्टीलाई गृहमन्त्रालय दिन अदालतको पूर्ण पाठ कुरिरहनु नपर्ने तर्क गर्नु भएको थियो ।
