नेपाल फ्लोरीकल्चार एसोसिएसनकाअनुसार तिहारमा २० लाख सयपत्री, मखमली तीन लाख र गोदावरीको २५ हजारसम्म माला खपत हुने अनुमान गरिएको छ ।
काठमाडौं । काठमाडौंको कालिमाटीमा रहेको गोल्ड गणपति गिफ्ट एण्ड सपले तिहारका लागि माला बिक्री गरिरहेको छ । यहाँको पसलमा सयपत्री, गोदावरी, मखमली गरी तीन प्रकारका फूलबाट भाइटीकको माला बनाइन्छ । पसलका सञ्चालक शिव मर्हजनकाअनुसार तीन प्रकारका फूलमा गुलाव, जरी र गोदावरी राखेर मालालाई थप आकर्षक बनाइन्छ ।
भाइटीकाका लागि ग्राहकको रोजाइ, डिजाइन र मूल्यका आधारमा बन्ने यस्ता माला विभिन्न थरीका हुन्छन् । सामान्य अवस्थामा मखमली मात्रै, सयपत्री मात्रै र गोदावरी मात्रैको पनि माला हुन्छ । मालाको मूल्य यसको लागतका आधारमा तय हुने मर्हजन बताउँछन् ।
उनको पसलमा ४० रुपैयाँदेखि २५ सय रुपैयाँसम्म पर्ने मालाहरु छन् । ‘भाइटीकाका लागि ८० देखि १०० रुपैयाँ गोटामा सयपत्री, मखमली ४० रुपैयाँ गोटा, गुलाब हालेको सयपत्री प्रतिगोटा ६५०, गोदावरी र सयपत्रीको मखमलीको ५५० पर्छ भने आकर्षक डिजाइनको भाइटीका माला २ हजार ५ सयसम्मको हुन्छ ।
जाउलाखेलमा रहेको द फ्रेस प्लावर सपले ४० देखि ३०० रुपैयाँसम्मको भाइटीका माला बेच्छ । आकर्षक डिजाइनसहितको माला ग्राहकको मागअनुसार बनाउन सकिने पसलका सञ्चालक सिताराम पन्त बताउँछन् । उनको पसलमा सुपारी फूलको माला ४० देखि ५० रुपैयाँ पर्छ, ८० देखि एक सय रुपैयाँ सयपत्री मालालाई पर्छ । यस्तै भाइटीकाको ताजा मालालाई ३०० रुपैयाँ भन्दा बढी पर्न सक्ने पन्त बताउँछन् ।
बजारमा अहिले नेपाली र भारतीय गरेर दुई प्रकारका फूलहरु भित्रिएको नेपाल फ्लोरीकल्चर एसोसिएसनले जनाएको छ । नेपाली कृषकले ल्याएको माला फ्रेस छ भने भारतबाट आएको माला कोल्ड स्टोरमा राखेर ल्याइएको हुँदा बिग्रन सक्ने जोखिम रहेको एसोसिएसनका उपाध्यक्ष सिताराम पन्त बताउँछन् । कोल्ड स्टोरमा राखिएको फूल लामो समय नटिक्ने, कुहिने, गन्हाउने हुनसक्ने पन्तको भनाइ छ । सकेसम्म नेपाली किसानले नै बिक्रीका लागि ल्याएको ताजा फूल किन्न उनले सुझाव दिए ।
कमलादीमा रहेको फ्रेन्स एन पेटल्स पुष्प पसलकी सञ्चालिका सुष्मा खड्का भाइटीकाका लागि आजैदेखि माला अर्डर गरेर किन्न र आफै सुरक्षित गर्न सकिने बताउँछिन् । काठमाडौं बाहिर जाने, वा पहिल्यै किन्न चाहनेले माला किनेर फ्रिजमा सामान्य स्टोर गरेररै राख्न सकिने खड्काले बताइन् । सामान्यतय तिहारकै दिन बिहान वा अघिल्लो दिन माला किने पनि हुन्छ तर आज भोलिमै किने पनि माला बिग्रिंदैन ।
नेपाल फ्लोरीकल्चार एसोसिएसनकाअनुसार तिहारमा २० लाख सयपत्री, मखमली तीन लाख र गोदावरीको २५ हजारसम्म माला खपत हुने अनुमान गरिएको छ ।
