काठमाडौं । नेकपा एकीकृत समाजवादी पार्टीबाट रामेछाप प्रदेशसभा ख का उम्मेदवर झम्क कँडेलले कुनै पनि हालतमा आफ्नो उम्मेदवारी फिर्ता नहुने बताउनु भएको छ । अहिलेको सक्ता गठबन्धनको गद्दारीका विरुद्ध आफूले उम्मेदवारी दिएकाले आफ्नो उम्मेदवारी फिर्ता नहुने उहाँको भनाइ छ ।
नेपाली काँग्रेसले गठबन्धन भित्रबाट बागी उम्मेदवारी दिएका उम्मेदवारहरूलाई उम्मेदवारी फिर्ता लिन असोज ३१ गतेसम्मको समय दिएको छ । माओवादी केन्द्र र नेकपा एकीकृत सामावादीले पनि गठबन्धनका विरुद्ध परेका बागी उम्मेदवारहरूको उम्मेदवारी फिर्ता गराउने प्रयास गरिरहेको छ । समाजवादीबाट रामेछाप प्रदेश ख का उम्मेदवार कँडेलले नेपाली काँग्रेस र नेकपा माओवादी केन्द्रको गुलाम बन्न आफूले उम्मेदवारी नदिएको बताउनुभयो ।
आफ्नो पार्टी, गठबन्धन जस्ता जुनसुकै निकायबाट जस्तो सुकै कुरा आए पनि आफ्नो उम्मेदवारी कायमै रहने उहाँको भनाइ छ । ‘बरु पार्टीले गर्ने जस्तो सुकै कारबाही भोग्न तयार छु, तर उम्मेदवारी कुनै पनि हालतमा फिर्ता हुँदैन’, उहाँले भन्नुभयो । नेकपा माओवादी केन्द्रले रामेछापको दुवै प्रदेश निर्वाचन क्षेत्र नछाडेपछि रामेछाप प्रदेश क मा दाबी गर्दै आएको नेकपा एकीकृत समाजवादी पार्टीले गठबन्धनका विरुद्ध प्रतिनिधिसभा र प्रदेशसभामा आफ्नो उम्मेदवार बनाएको छ।
समाजवादीले प्रतिनिधिसभा सदस्य तर्फ पार्टी पोलिटव्यूरो सदस्य एवं जिल्ला इन्चार्ज देवशङ्कर पौडेल, प्रदेशसभा सदस्य क मा जिल्ला अध्यक्ष रमेशकुमार बस्नेत र प्रदेश ख मा पार्टी केन्द्रीय सदस्य झम्क कँडेललाई उम्मेदवार बनाएको छ ।
