काठमाडाैँ । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’को निर्वाचन क्षेत्रको चुनावी कमाण्ड पुत्री रेनु दाहालले सम्हाल्ने भएकी छन् । माओवादी केन्द्र, बागमती प्रदेशको आइतबार बसेकाे केन्द्रीय सदस्यसहितको पदाधिकारी बैठकले विभिन्न निर्वाचन क्षेत्रहरूमा कमाण्ड गर्ने नेताहरूका नामावली टुङ्ग्याएकाे हाे । यसक्रममा प्रचण्डकाे निर्वाचन क्षेत्र चितवन ३ काे चुनावी कमाण्ड भरतपुर महानगर प्रमुखसमेत रहेकी रेनुलाई दिइएकाे हाे ।
यसैगरी बैठकले चितवन क्षेत्र नं. १ को चुनावी कमान्डरमा कञ्चन खनाललाई दिएको छ । क्षेत्र नं. २ मा घनश्याम दाहाल कमाण्डर तोकिएका छन् ।
बागमतीमा पर्ने सबै जिल्लाको चुनावी कमाण्डर पनि चुनेकाे छ । जसमा काठमाडाैँकाे १ मा अनिल शर्मा, २ मा कुमार पौडेल, ३ मा बद्री बजगाईं, ४ मा गोविन्द बटाला, ५ मा कल्पना शर्मा, ६ मा हिमाल शर्मा, ७ मा रामबाबु फुँयाल,८ मा सरिता श्रेष्ठ, ९ मा शंकर दुलाल र १० मा अञ्जना विसङ्खेलाई जिम्म्वारी दिइएकाे छ ।
काठमाडाैँ महानगरभित्रको सबै चुनावी कमाण्ड मुक्ति प्रधानले गर्नेछन् । यस्तै भक्तपुर जिल्लाको क्षेत्र नं. १ मा देवेन्द्र श्रेष्ठ र डीपी ढकाल तथा २ को कमान्डरमा दिलीप प्रजापति चयन भएका छन् । ललितपुरमा क्षेत्र नं. १ मा गंगा पराजुली, २ मा उर्मिला लामा र क्षेत्र नं. ३ मा हरि दाहाल र पद्मा राईलाई कमाण्डर बनाउने निर्णय गरेको छ ।
उता काभ्रे जिल्लामा सूर्यमान दोङ र रुकु चौलागाई, सिन्धुपाल्चोकमा माधव सापकोटा र शरद दुलाललाई चुनावी कमाण्डर बनाएको छ । दोलखामा देवी खड्का कमाण्डर चयन हुँदा रामेछापमा श्यामकुमार श्रेष्ठ बनेका छन् भने सिन्धुलीमा दीर्घराज श्रेष्ठ र वसन्त माझी चुनिएका छन् ।
मकवानपुरको क्षेत्र नं. १ मा विजय गौतम र क्षेत्र नं. २ मा कुमारी मोक्तान कमाण्डर चुन्ने निर्णय भएको छ । नुवाकोटमा हितबहादुर तामाङ क्षेत्र नं. १ र विमला सुवेदी क्षेत्र नं. २ का लागि चुनावी कमाण्डर बनाइएका छन् । यस्तै धादिङमा शालिकराम जम्कट्टेले एक्लै चुनावी कमाण्डर बनेका छन् ।
