काठमाडौँ । गण्डकी प्रदेशका केही जिल्लामा भारी वर्षा भएको छ । मौसम पूर्वानुमान महाशाखाका अनुसारकाअनुसार सबैभन्दा बढी कास्कीमा वर्षा भएको हो ।
पछिल्लो २४ घण्टामा कास्कीको लामपाटनमा सबैभन्दा धेरै ३३४ मिलिमिटर वर्षा मापन भएको छ । त्यहाँ १२ घण्टामा २४०.२ मिलिमिटर वर्षा मापन भएको महाशाखाले जनाएको छ । २४ घण्टामा १४० मिलिमिटर र १२ घण्टामा १२० मिलिमिटरभन्दा धेरै पानी पर्नुलाई खतरा मानिन्छ ।
वर्षाका कारण पोखराका धेरैजस्तो स्थान जलमग्न भएका छन् । कास्कीका साथै चितवनको शक्तिखोरमा २४ घण्टामा २०९.४, इटहरीको तरहरामा २४ घण्टामा १४५.६ मिलिमिटर वर्षा मापन भएको छ ।
यी क्षेत्रमा आज बाढीको खतरा
देशका केही नदीहरूमा आज पनि पानीको बहाव उल्लेख्य बढ्ने पूर्वानुमान छ । जल तथा मौसम विज्ञान विभागअन्तर्गतको बाढी पूर्वानुमान महाशाखाका अनुसार आज त्रिवेणीस्थित तमोर, सिम्लेस्थित अरुण, रबुवाबजारस्थित दूधकोसी, बुस्तीस्थित तामाकोसी, हम्पचुवारस्थित सुनकोसी नदीमा बहाव उल्लेख्य बढ्नेछ ।
देवघाटस्थित नारायणी, बेत्रावतीस्थित त्रिशूली, आरुघाटस्थित बूढीगण्डकी, विमलनगरस्थित मर्स्याङ्दी, दमौलीस्थित सेती, कुमालगाउँस्थित कालीगण्डकी, मैनाचुलीस्थित कन्काई, वेलस्रोतस्थित कमला नदी, पधेरादोभानस्थित वाग्मती, रजैयास्थित पूर्वी राप्ती र चेपाङस्थित बबई नदीमा बहाव उल्लेख्य बढ्ने पूर्वानुमान छ । यस्तै, अरू केही ठूला नदीमा बहाव सामान्य बढ्ने जनाइएको छ ।
आज झापा, मोरङ, सुनसरी, उदयपुर, धनकुटा, संखुवासभा, काठमाडौं, मकवानपुर, चितवन, गोरखा, लमजुङ, कास्की, पर्वत, म्याग्दी, स्याङ्जा, तनहुँ, नवलपरासी (बर्दघाट सुस्ता पूर्व), नवलपरासी (बर्दघाट सुस्ता पश्चिम), पाल्पा, कालीकोट, दार्चुला र आसपास भई बहने केही साना नदीहरूमा पनि बहाव बढ्नेछ । केहीमा आकस्मिक बहाव समेत हुन सक्ने पूर्वानुमान छ । नदीतटीय क्षेत्रमा सतर्कता अपनाउन महाशाखाले आग्रह गरेको छ ।
